Oblys ortalyǵynda Jaiyq ózenindegi sý deńgeiiniń kóterilýine jáne Iriklin sý qoimasynan sý aǵynynyń ulǵaiýyna bailanysty jaǵalaýdy nyǵaitý jumystary qarqyndy júrgizilip jatyr dep habarlaidy Atyraýdyń jedel shtaby telegram kanaly.
Sońǵy alty kúnde (13 sáýir kúni tańerteńgi málimet boiynsha) josparlanǵan 215,1 shaqyrymnyń 101,2 shaqyrymyna jaǵalaýdy nyǵaitý bógetteri salyndy. Aita ketý kerek, bastapqyda kartografiialyq derekter boiynsha uzyndyǵy 105 shaqyrym bóget qurylysy josparlanǵan.
Búgingi tańda Atyraý qalasynyń mańynda ornalasqan, Jaiyq ózeni men Kaspii teńizi arasyndaǵy mańyzdy arteriia - Sokolok kanalyn tereńdetý jáne keńeitý jumysy qarqyndy júrgizilýde, onyń uzyndyǵy - 24 shaqyrym. Arna keńeitilip, qalǵan topyraq bógetterdi nyǵaitýǵa qoldanylady. Sondai-aq, qazirgi Sokolok kanalynyń janynan qosymsha kanal salynyp jatyr. Sokolok kanalynan sý tasyp ketken jaǵdaida ekinshi kanal rezervtik gidrotehnikalyq qurylys qyzmetin atqarady. Qazir 12 shaqyrymynyń jumysy aiaqtaldy.
Tek Atyraý qalasy boiynsha jaǵalaýdy nyǵaitý bógetterin salýǵa 1 myńǵa jýyq arnaiy tehnika, 3,2 myń túrli mekemelerdiń qyzmetkeri jáne 3,5 myńnan astam erikti jumyldyryldy.
Jergilikti tórt kompaniianyń kúshimen Qaraózek kanalynyń jaǵalaýyn bekitý jumystary júrgizilýde. Onyń uzyndyǵy 35 shaqyrymnan astam - Atyraý-Oral tas jolynan Erkinqala aýyldyq okrýgine deiin. Bul kanal Jaiyqtyń bir salasy bolǵandyqtan ózen úshin erekshe mańyzdy. Munda bógetterdi nyǵaitý (qosymsha 1,5-2 metrge kóteriledi), arnany, kópir ótkelderi men shliýzderdi tazartý jumystary júrgizilýde. Sonymen qatar, sońǵy jyldary sharýa qojalyqtarynyń qojaiyndary kanal arqyly qubyrlar men topyraqtan ótkelder júrgizgen, olar qazir sýdyń ótýin jaqsartý maqsatynda ashylyp jatyr.
Qaraózek kanalynyń jaǵalaýyn bekitý jumystaryna tórt kompaniiadan 350 adam, 50-80 jergilikti turǵyn men eriktiler, sondai-aq 70-ten astam arnaiy tehnika jumyldyrylǵan. Aita ketetin jait, josparlanǵan jumystar aiaqtalǵannan keiin bul kompaniialar mol sýdyń kelýi kezinde baqylaýdy jalǵastyrady. Al qajet bolǵan jaǵdaida qiyn aimaqtarǵa tartylady.
Jalpy, qala irgeles aýyldyq okrýgterimen birge 107 ýchaskege bólinip, árqaisysyna jaýapty tulǵa bekitilip, atqarylǵan jumystar týraly aqparat kún saiyn jańartylyp otyrady. Sý tasqynyna daiyndyq jumystaryna Ishki ister ministrligi men Qorǵanys ministrliginiń Ulttyq Ulan bólimsheleri jumyldyryldy, basqa óńirlerden tehnikalar kelip jatyr, óńirdegi iri munai kompaniialarynyń kúshteri men quraldary da jumyldyryldy. Sonymen qatar, Memleket basshysynyń tapsyrmalaryn oryndaý aiasynda jergilikti kásipkerlik sýbektileri belsendi atsalysýda.
