Atyraý ekologtary munai óńdeý zaýyty mańynda aýa sapasyn tekserýge kiristi, dep habarlaidy QazAqparat.
Oblystyq Ekologiia departamentiniń baspasóz qyzmetinen málim etkendei, mamandar Atyraý munai óńdeý zaýytynyń sanitarlyq-qorǵanysh aimaǵynyń shekarasynda atmosferalyq aýadan synamalar alýǵa kiristi.
Ekologtardyń jedel áreket etýine Atyraý munai óńdeý zaýytynda elektr qýaty sónip, qondyrǵylar toqtatylǵany sebep bolyp otyr.
«Búgin, 27 shildede jergilikti ýaqytpen saǵat 17:05-ten bastap «KEGOK» AQ-nyń №209 jáne №210 jelileri apattyq jaǵdaida sóndirilgen. Osyǵan bailanysty «AMÓZ» JShS-niń elektrmen jabdyqtaý jelisinde kerneý tómendegen. Sonyń saldarynan zaýyttyń tehnologiialyq qondyrǵylaryndaǵy dinamikalyq jabdyqtyń bir bóligi álsin-álsin toqtap turǵan. Tótenshe jaǵdaidyń aldyn alý maqsatynda zaýyttyń otyn jelisi alaý júiesine baǵyttaldy. Jedel áreket etý maqsatynda departamenttiń zerthana-taldamalyq baqylaý bóliminiń mamandary Atyraý munai óńdeý zaýytynyń sanitarlyq-qorǵanysh aimaǵynyń shekarasynda atmosferalyq aýanyń synamalaryn alyp jatyr», - dep habarlady departamenttiń baspasóz qyzmetinen.
Atyraý munai óńdeý zaýytynyń qoǵammen bailanys bóliminiń málimetinshe, «KEGOC» AQ elektr qýatyn jospardan tys toqtatyp tastaǵan. Osyǵan bailanysty zaýyt jumysy avariialyq jaǵdaida toqtady. Bul óndiristiń jumysyna keri áserin tigizedi.
Aita keteiik, Atyraý MÓZ-de apattyq jaǵdai búgin keshke bolady.
Artynsha, QR Energetika ministrligi jaǵdaiǵa túsinik berip, elektr jelilerindegi apatty joiý jumystary bastalǵanyn málim etti.
