Almaty qalasy boiynsha Din isteri basqarmasynyń oq tiip, jaralanǵan qyzmetkeri Nurlan Kikimov Tengrinews.kz tilshisine jaǵdaiyn aityp berdi.
"Qazir meni bir aýrýhanadan ekinshi aýrýhanaǵa aýystyryp jatyr. Qai aýrýhanada ekenimdi aita almaimyn. Qajetti shuǵyl ota jasaldy (...) Oqty ala almady, dárigerler konsiliým júrgizip, negizgi otany dene saýyqqan kezde jospar boiynsha jasaǵan durys deidi. Arqamnan ókpege oq ótken. Oq jaýyryndy tesip ketken", - dedi Kikimov.
Sheneýnik qazir aýrýhanalardyń birinde em qabyldap jatyr, onyń jaǵdaiy turaqty dep baǵalanǵan. "Men em qabyldap, synamalar tapsyryp jatyrmyn", - dep qosty sheneýnik.
Kikimov shtabta jumys istegenin, sol kúni, 6 qańtarda ákimdik ǵimaraty lańkesterden bosatylǵany týraly habarlanǵanyn aitty.
"Biz shyǵyndy anyqtaý úshin oqiǵa ornyna barǵanda, uiymdasqan top shabýyl jasady. Bul kelisilgen jáne maqsatty áreket. Olar atyp qana qoimai, artymyzdan qýdy", - dedi ol.
Buǵan deiin Almaty ákimi Baqytjan Saǵyntaevqa shabýyl jasalǵany habarlanǵan bolatyn. 6 qańtarda Almaty ákimi Baqytjan Saǵyntaevtyń kortejine shabýyl jasaldy. Oqiǵanyń mán-jaiyn "Almaty" telearnasynyń bas direktory Nurjan Jalaýqyzy aityp berdi. Shabýyl kezinde telearna qyzmetkerleriniń biri qaza bolǵan edi.
