Aýǵan soǵysynyń ardageri, jaýyngerler arasynda «Qara maior» atanǵan, QR Qarýly Kúshteriniń otstavkadaǵy polkovnigi Boris Kerimbaevty aqtyq saparǵa shyǵaryp salý rásimi 14 aqpanda Ofitserler úiinde ótedi. Bul týraly Almaty ákimshiliginiń janyndaǵy Aýǵanstandaǵy soǵys ardagerleri jáne múgedekteri birlestikteriniń úilestirýshi keńes tóraǵasy Murat Ábdishúkirov habarlady.
«Marqumdy aqtyq saparǵa shyǵaryp salý sharasy Almatydaǵy ofitserler úiinde 14 aqpan tańǵy 9.00-ǵa belgilendi. Odan soń 28 Panfilovshylar saiabaǵyndaǵy Aýǵan soǵysynda qaza bolǵandarǵa arnalǵan eskertkish mańynda qaraly miting ótedi»,- dedi M.Ábdishúkirov.
Eske sala keteiik, aty ańyzǵa ainalǵan «Qara maior» 71 jasyna qaraǵan shaǵynda kóz jumdy.
Boris Tókenuly Kerimbaev 1948 jyly 12 qańtarda Almaty oblysynyń Jambyl aýdanynda dúniege kelgen. 1970 jyly V. I. Lenin atyndaǵy Tashkent áskeri ýchilishesin támamdaǵan. 1980-1983 jyldary Aýǵan soǵysyna qatysyp, arnaiy tapsyrmalardy oryndaityn musylman batalonynyń komandiri boldy. Saýatty basshylyqtyń arqasynda batyr komandirdiń sarbazdary az shyǵynǵa ushyrap, kóbinese jeńiske jetip otyrǵan. Pandsher shatqalynda modjahedterdiń ataqty qolbasshysy Ahmad Shah Masýdtyń áskerimen soǵysqan.
Onyń erligi ańyzǵa ainalyp, «Qara maior» degen laqap aty kúlli aimaqqa jaiylǵan. 1992 jyly densaýlyǵyna bailanysty polkovnik shenimen otstavkaǵa shyqty. Batyr týraly «Qara maior» filmi túsirilgen.
