Foto: © Sputnik
Aqmola oblysyndaǵy koloniiada sottalýshyny azaptaý deregine qatysty tergeý nátijesinde 14 qyzmetker qyzmetinen bosatyldy. Bul týraly QR IIM Qylmystyq-atqarý júiesi komiteti málim etti, dep habarlaidy "Ult aqparat".
"Áleýmettik jelilerde ornalastyrylǵan beinejazbaǵa sáikes, Aqmola oblysy boiynsha QAJD mekemesi ákimshiliginiń jáne qyzmetkerlerdiń zańdy talaptarǵa baǵynbaý faktileriniń jolyn kesý kezinde arnaiy quraldardy qoldaný arqyly qyzmettik babyn asyra paidalaný belgileri baiqalǵanyn habarlaimyz.
Júrgizilgen qyzmettik tergeý nátijeleri boiynsha, Tártiptik komissiianyń sheshimimen oblystyq Qylmystyq-atqarý júiesi departamentiniń bastyǵy jáne onyń orynbasary, sondai-aq koloniia bastyǵy atqaratyn laýazymdarynan shettetýge usynyldy. Sonymen qatar quqyq buzýshylyqqa qatysy bar 11 qyzmetker IIO-dan teris sebeptermen jumystan shyǵarýǵa usynyldy.
Qazirgi ýaqytta prokýratýra organdary sotqa deiingi tergeý júrgizip jatyr" - delingen habarlamada.
Eske salaiyq, áleýmettik jelide áskeri kiim kigen jeti adamnyń túrmedegi sottalýshyny dárethana jýýdan bas tartqany úshin jabyla soqqyǵa jyǵyp, azaptaý ádisterin qoldanǵan videosy tarap, qoǵam narazylyǵyn týdyrǵan edi.
