Aqmola oblysynyń Atbasar aýdanynda 22 jańa arheologiialyq eskertkish tabyldy.
Eskertkishterdiń birazy mal jailymy jáne sýdyń astynda qalǵan. Keler jyly bulardy qorǵaý jumystaryn júrgizý josparlanǵan, dep habarlaidy "Ult aqparat".
Aqmola oblystyq mádeniet, arhivter men qujattamalar basqarmasynyń janyndaǵy Tarihi-mádeni murany qorǵaý jáne paidalaný ortalyǵy direktorynyń mindetin atqarýshy Serik Ysqaqovtyń aitýynsha, 2020 jyldyń maýsym aiynda josparǵa sai Atbasar aýdanynda jańa arheologiialyq obektilerdi anyqtaý maqsatynda barlaý jumystary júrgizilgen. Barlaý nátijesinde qola jáne erte temir dáýirine jatatyn taǵy 22-ge jýyq jańa arheologiialyq eskertkish anyqtaldy. Jalpy, buǵan deiin aýdan aýmaǵynda 114-ten asa arheologiialyq nysan ornalasqan.
«Esil jáne Jabai ózenderiniń soltústik jáne soltústik-batys jaǵynda qola, neolit, al batys jaǵynda erte temir dáýirindegi arheologiialyq nysandar tabyldy. Budan bólek, orta ǵasyrlarda jerlengen oryndar, sondai-aq, qazirgi zamanǵy arheologiialyq eskertkishter tabyldy», - deidi Serik Ysqaqov.
Ortalyq basshysy atap ótkendei, tabylǵan arheologiialyq nysandardyń birazy mal jailymy jáne sýdyń astynda qalǵan. Keler jyly bulardy anyqtap, qorǵaý jumystaryn júrgizý josparlanǵan.
«Qazirgi kezde, bul arheologiialyq nysandarǵa qaýip tónip turǵan joq. Keler jyly olardy qorǵaý jumystaryn jalǵastyramyz. Sol kezde jańa arheologiialyq nysandar ashylyp qalýy múmkin», - deidi Serik Ysqaqov.
Aita keteiik, osyǵan deiin Aqmola oblysyndaǵy Magdalinovka V qorymynan kóne qylysh tabylǵan bolatyn. Ony arheolog ǵalymdar erte temir dáýiriniń eskertkishi ekenin anyqtady.
Magdalinovka V qorymy Magdalinovka aýylynan batysqa qarai 1,3 km, Esil ózeniniń sol jaǵalaýynan 300m jerdegi biik qyrdyń ústinde ornalasqan. Qorym alǵash ret 1992 jyly anyqtalyp, 2006 jyly A.A.Pleshakovtyń jetekshiligimen SQAE qaita zerttelgen. 2020 jyly Aqmola oblysy mádeniet, arhivter men qujattamalar basqarmasy «Tarihi-mádeni murany qorǵaý jáne paidalaný ortalyǵy» KMM-men Atbasar aýdanynda jańa arheologiialyq obektilerdi anyqtaý maqsatynda barlaý jumystar kezinde qaita zertteldi.
