QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov ataýly áleýmettik kómek mólsheri qalai esepteletindigin túsindirdi, dep habarlaidy "Ult aqparat".
«Ataýly áleýmettik kómek kirisi tómen otbasylarǵa beriledi. Iaǵni, otbasynyń jan basyna shaqqandaǵy kirisi eń tómengi kúnkóristiń 70 paiyzynan tómen bolýy tiis. Eń tómengi kúnkóristiń 70 paiyzy – bul kedeishilik shegi. Iaǵni, ataýly áleýmettik kómek mólsheri kedeishilik shegi men otbasynyń árbir múshesine shaqqandaǵy kiristiń aiyrmasy arqyly anyqtalady», - dedi ol Ortalyq kommýnikatsiialar qyzmetindegi brifing barysynda.
Osy rette departament basshysy ataýly áleýmettik kómek mólsherin naqty mysal keltire otyryp atap berdi.
«Máselen, otbasyda 3 bala jáne ákesi men anasy bar delik. Ata-analardyń biri bala kútimine bailanysty demalysta, al otbaǵasy jumys isteidi. Biraq, jalaqysy 50 myń teńge ǵana. Demek, otbasynyń árbir múshesin shaqqanda ai saiynǵy kiris 10 myń teńgeden ainalady. Mundai jaǵdaida bizdegi kedeishilik shegi 24 012 teńgeni quraidy. Bul respýblika boiynsha orta deńgei. Óitkeni, kedeishilik shegin árbir óńir aimaq ómiriniń ekonomikalyq deńgeiine bailanysty derbes aiqyndaidy. Osyndai jaǵdaida ataýly áleýmettik kómektiń ortasha mólsheri otbasynyń árbir múshesine 14 myń teńgeden ainalady. 5 adamǵa ai saiyn shamamen 70 myń teńge tólenedi. Ataýly áleýmettik kómek mólsheri naqty bekitilmegen. Ol otbasynyń kirisine bailanysty», - dedi Asqar Niiazov.
