Jańa formatta ataýly áleýmettik kómek alýshylardyń sany 504 myń adamdy qurady. Bul týraly QR Eńbek jáne halyqty áleýmettik qorǵaý ministri Mádina Ábilqasymova málim etti, dep habarlaidy QazAqparat.
«2018 jyly memlekettik biýdjette jańa formattaǵy ataýly áleýmettik kómekti engizý úshin 28,9 milliard teńge, onyń ishinde nysanaly transfertter esebinen respýblikalyq biýdjetten 18,4 milliard teńge jáne jergilikti biýdjetten 10,6 milliard teńge bólý kózdelgen. 2018 jylǵy 9 aiǵa ataýly áleýmettik kómek tólemderiniń somasy 19,5 milliard teńgeni nemese 67,4 paiyzdy qurady», - dedi ministr Parlament Májilisindegi Úkimet saǵatynda.
Respýblikalyq biýdjetten bólingen nysanaly transfertterdiń edáýir igerilýi myna aimaqtarda baiqaldy: Túrkistan oblysynda (100%), Shyǵys Qazaqstan oblysynda (99,5%), Soltústik Qazaqstan oblysynda (99,1%), Pavlodar oblysynda (91%), sondai-aq Shymkent qalasynda (99,9%).
Al Almaty qalasynda (16,9%), Astana qalasynda (34,4%), sondai-aq Mańǵystaý oblysynda (46,8%) bólingen transfertter tómen deńgeide igerilgen.
«9 aidyń qorytyndysy boiynsha jańa formatta ataýly áleýmettik kómek alýshylardyń sany 504 myń adamdy nemese 97,3 myń otbasyn quraidy. Onyń ishinde 72,4 myń adam nemese ataýly áleýmettik kómek alýshylardyń 14,4 paiyzy shartsyz aqshalai kómek, al 431,6 myń adam, iaǵni 85,6 paiyzy shartty aqshalai kómek alady», - dedi vedomstvo basshysy.
Óńirler bólinisinde ataýly áleýmettik kómek alýshylardyń kóbi Túrkistan oblysynda - 34,8 paiyz, Jambyl oblysynda - 11,7 paiyz, Almaty oblysynda - 10,7, Qyzylorda oblysynda - 7, sondai-aq Shymkent qalasynda - 9,7 paiyz.
Sonymen qatar, ministr ataýly áleýmettik kómek qurylymynda balaly otbasylar basym ekenin aitty.
«Ataýly áleýmettik kómek alýshylardyń qurylymynda balaly otbasylar basym. Olar shamamen 41 paiyzyn quraidy. Áleýmettik-demografiialyq kórsetkishter boiynsha kúnkórisi tómen kóp balaly otbasylardyń 75,7 paiyzy ońtústik óńirlerde turady. Atap aitqanda, Shymkent qalasynda, Túrkistan oblysynda, Qyzylorda oblysynda, Jambyl oblysynda jáne Almaty oblysynda ornalasqan», - dedi ministr.
Onyń sózine qaraǵanda, ataýly áleýmettik kómek alýshy otbasylardyń qurylymynda 25 paiyzyn tolyq emes otbasy qurady. Budan basqa, shartsyz aqshalai kómek alýshylardyń quramynda tolyq emes otbasylardyń úlesi 87,4 paiyz.
«Ataýly áleýmettik kómek alýshylardyń arasynan áleýmettik statýstar bólinisinde balalardyń sany kóbirek - 321,1 myń bala nemese 63,7 paiyz», - dedi Mádina Ábilqasymova.
Basqa sanattarǵa tómendegi adamdar kiredi: balalarǵa, múgedekterge, qarttarǵa kútim kórsetýmen ainalysatyn adamdar - 18,6 paiyz (toqsan úsh myń jeti júz adam); kómekke júgingen sátte jumys istep júrgen adamdar - 8,4 paiyz ( qyryq eki myń eki júz adam); ózin-ózi jumyspen qamtyǵandar - 4,7 paiyz) ( jiyrma úsh myń jeti júz adam); jumyssyzdar - 1,8 paiyz.
Sondai-aq stýdentter - 2,1 paiyz (on myń tórt júz adam); múgedekter - 0,5 paiyz (eki myń alty júz adam); zeinetkerler - 0,3 paiyz ( bir myń tórt júz adam).
Budan buryn habarlanǵandai, Májilistegi Úkimet saǵatynda QR Eńbek jáne halyqty áleýmettik qorǵaý ministri ataýly áleýmettik kómektiń jańa formatyn jetildirý boiynsha usynystar pysyqtalyp jatqanyn málim etti.
Sonymen qatar Mádina Ábilqasymova kedeilik deńgeiin tómendetýge qatysty málimetterdi jariialady.
