QR Indýstriia jáne infraqurylymdyq damý ministri Beibit Atamqulov otandyq ónerkásip salasynyń damýyn tejep turǵan faktorlardy atady, dep habarlaidy "Ult aqparat".
«Jańa tásilder men qaǵidatty sheshimder ázirleýdi talap etetin birqatar júieli máseleler áli de ashyq kúiinde qalyp otyr. Olar: importtalatyn ónimniń joǵary úlesi, shikizatqa shekteýli qoljetimdilik, tsifrlyq tehnologiialardy paidalanýdyń tómen deńgeii, syrtqy naryqta ilgerletý kezindegi kedergiler men shekteýler jáne óndiristi jańǵyrtýǵa qarajattyń jetispeýi», - dedi Beibit Atamqulov Senatta ótip jatqan «QR ónerkásiptik saiasatty zańnamalyq retteý: jai-kúii, problemalary jáne sheshý joldary» taqyrybyndaǵy Úkimet saǵatynda.
Onyń aitýynsha indýstriialandyrýdy odan ári damytý úshin keshendi, júieli tásildiń qajettiligin nazarǵa ala otyryp, Memleket basshysy «Ónerkásiptik saiasat týraly» zań jobasyn ázirleýdi tapsyrǵan.
«Zań jobasynyń maqsaty - qazirgi zamanǵy ónimdiligi joǵary, básekege qabiletti, eksportqa baǵdarlanǵan ónerkásipti jedel damytý arqyly ulttyq ekonomikanyń básekege qabilettiligin arttyrý. Zań jobasy negizgi mindetter retinde mynalardy aiqyndaidy: qolaily indýstriialyq klimatty qamtamasyz etý, básekege qabiletti óndiristerdi damytýdy qamtamasyz etý, innovatsiialardy tiimdi engizý, ónerkásipte elishilik qundylyqty damytý», - dedi ol.
