Aldaǵy jylytý maýsymyna daiyndaq barysynda el aýmaǵynda 5 myń shaqyrym jylý qubyry, 11,2 myń shaqyrym sý qubyry jóndeýden ótýi tiis. Indýstriia jáne infraqurylymdyq damý ministri Beibit Atamqulov Úkimet otyrysynda osyndai aqparat berdi, dep habarlaidy "Ult aqparat".
«Aldaǵy 2021-2022 jylǵy jylý berý maýsymyna áleýmettik sala obektileriniń 65 myńnan astamyn daiyndaý qajet», - dedi Beibit Atamqulov.
Onyń ishinde 6 myń densaýlyq saqtaý nysany, 11,2 myń bilim berý nysany, 47,6 myń turǵyn úi bar. Sondai-aq, 11 myń avtonomdyq qazandyq qondyrǵylaryn jáne 19 myń shaqyrym injenerlik jelini qalypqa keltirý kózdelip otyr. Atap aitqanda, 5 myń shaqyrym jylýmen jabdyqtaý jelisin, 14,2 myń shaqyrym sýmen jabdyqtaý jelisin maýsymǵa daiyndaý qajet.
«Jylý berý maýsymyna ýaqytyly jáne sapaly daiyndalý maqsatynda óńirlerge 1 maýsymǵa qarai turǵyn úi-kommýnaldyq sharýashylyq, turǵyn úi jáne áleýmettik sala obektilerin daiyndaý jónindegi is-sharalar josparyn bekitý usynylady. Sondai-aq, 1 qyrkúiekke deiin bilim berý obektileriniń 100% daiyndyǵyn qamtamasyz etý qajet. 15 qazanǵa deiin turǵyn úi-kommýnaldyq sharýashylyq, turǵyn úi, densaýlyq saqtaý jáne áleýmettik salanyń barlyq obektileriniń tolyq daiyndyǵyn qamtamasyz etý, qurylys normalary men erejelerin saqtamai ornatylǵan avtonomdyq jylý berý júielerin shyǵarýdy aiaqtaý, injenerlik infraqurylym júiesiniń jylý berý maýsymyna daiyndyǵyn belgilengen merzimde aiaqtaý, avtonomdyq qazandyqtarda otynnyń normativtik qoryn qamtamasyz etý jumystaryn tolyǵymen aiaqtaý kerek», - dedi vedomstvo basshysy.
