Foto: «Atameken» UKP
"Atameken" UKP eks-basshysy Abylai Myrzahmetov 5 jylǵa bas bostandyǵynan aiyryldy, dep habarlaidy "Ult aqparat".
Astana qalasynyń qylmystyq ister jónindegi mamandandyrylǵan aýdanaralyq sotynda asa iri mólsherde alaiaqtyq jasaǵany úshin Abylai Myrzahmetovke qatysty qylmystyq is qaraldy.
Sotta anyqtalǵandai, A.Myrzahmetov 2022 jylǵy mamyr aiynan qazanǵa deiin B.-ǵa aqshalai syiaqy úshin memlekettik jáne quqyq qorǵaý organdarynyń joǵary laýazymdy tulǵalary arqyly aǵasy B.-ny qamaýdan bosatý jáne oǵan qatysty sotqa deiingi is júrgizýdi toqtatý máselesin sheshýge tyrysqan. Osylaisha B.-nyń asa iri mólsherde 13,9 mlrd. teńge somasynda aqshalai qarajatyn jymqyrǵan.
Prokýror aiyptaýdy qoldady.
Sottalýshy kinásin moiyndap, ádil jaza taǵaiyndaýdy, qorǵaýshylar is boiynsha is júrgizýdi toqtatýdy surady.
Sot kúdiktini kináli dep tapty. Bul baptyń sanktsiiasy 5 jyldan 10 jylǵa deiingi merzimge bas bostandyǵynan aiyrý túrindegi negizgi jazany kózdeidi.
Sot sottalýshynyń kinásin moiyndaýyn, shyn júrekten ókinýin, ózi jasaǵan qylmysty tergeýge jáne qylmys jasaý nátijesinde alynǵan múlikti izdestirýge járdemdesýin, kámeletke tolmaǵan balasynyń bolýyn jaýapkershilik pen jazany jeńildetetin mán-jailar retinde tanydy.
Qylmystyq jaýaptylyq pen jazany aýyrlatatyn mán-jailar anyqtalǵan joq.
Myrzahmetovtiń kinási sottalýshynyń óz kinásin moiyndaýymen, kýálardyń aiǵaqtarymen, qaryz sharttarymen jáne qylmystyq istiń basqa da materialdarymen dáleldendi.
"Sot úkimimen A.Myrzahmetov asa iri mólsherde alaiaqtyq jasaǵany úshin kináli dep tanylyp, jergilikti ózin-ózi basqarý organdarynda jáne kvazimemlekettik sektor sýbektilerinde 10 jyl merzimge qyzmet atqarý quqyǵynan aiyryla otyryp, memleket kirisine qylmystyq jolmen alynǵan 5,8 mlrd. teńge somasynda aqsha qarajaty tárkilenip, 5 jylǵa bas bostandyǵynan aiyryldy", – delingen habarlamada.
Eske salaiyq, "Atameken" Ulttyq kásipkerler palatasynyń burynǵy basqarma tóraǵasy Abylai Myrzahmetov 30 million dollar para alyp jatqan jerinen ustalǵan edi. Myrzahmetov Talǵat Boranbaevqa memlekettik jáne quqyq qorǵaý organdarynyń joǵary laýazymdy tulǵalar arqyly aǵasy Qairat Boranbaevty qamaýdan bosatý jáne oǵan qatysty sotqa deiingi is júrgizýdi toqtatý týraly máseleni sheshý úshin para berýdi usynǵan.
Tergeý málimetteri boiynsha, 2022 jyldyń 10 mamyrynda Myrzahmetov Máskeýde bolǵan kezinde Talǵat Boranbaevqa 30 million dollardy ekige bólip, másele oń sheshilgenge deiin 15 million dollar, al is sheshilgen soń taǵy 15 million dollar aýdarýdy tapsyrǵan.
