Qyrǵyzstannyń burynǵy prezidenti Almazbek Atambaev ózin ustaýǵa kelgen arnaiy jasaq ókilderiniń áreketin synap, málimdeme jasady. Onyń málimdemesin 8 tamyz tún aýa "Aprel" telearnasy kórsetti.
- Keshe olar (arnaiy jasaqty aitady - red.) "tergeýge alyp ketýge keldik" degen joq. Bandittei bolyp kelip, eldi ata bastady. Men "bireý meniń úiime kelse qarsylyq kórsetem, kerek bolsa atam" dep birneshe aidan beri aityp kelem. Mende syilyqqa berilgen tapansha, vintovka bar. Munda qarý tek mende ǵana bar. Úshinshi qabatta otyryp ózim ǵana qarsylyq kórsetip otyrdym. Qarapaiym adamdardyń qolynda bálkim tas boldy. Biraq bir de bireýinde qarý bolǵan joq, - dedi ol.
Atambaev óz málimdemesinde "biliktiń áreketin zańsyz" dep atady. Atambaevtyń sózine qaraǵanda, ony ustaýǵa kelgender terrorizmge qarsy kúrestiń arnaiy jasaǵy.
- Olar aldymen rezeńke oq, sońynan shyn oq atty. Men - terrorist emespin. Batýkaev isine qatysty meniń tarabymnan eshqandai jemqorlyq áreketi joq. Ony Sooronbai Jeenbekovtiń ózine de aitqam. Muny Atambaevtyń aýzyn jabý úshin istep jatyr. Qyrǵyz halqy bir klanǵa, bilikke tizerlep ómir súre almaidy. Bilik óz elin atýdy, óz elimen kúresýdi toqtatýy kerek, - dedi eks-prezident.
Qyrǵyzstannyń burynǵy prezidenti ózin qorǵap, arnaiy jasaqqa qarsy turǵan turǵyndarǵa alǵys aitty.
7 tamyzda Bishkek ýaqytymen keshki saǵat segiz shamasynda arnaiy jasaq eks-rezident Almazbek Atambaevty ustaý operatsiiasyn bastaǵan. 8 tamyz túngi úsh shamasynda arnaiy jasaq Koi-Tashtan shyqty, Almazbek Atambaevty ustaǵan joq.
