Ataqty jelaiaq Marat Jylanbaevtyń jolyn qýǵym keledi. Qaztalov aýdanynda turatyn 25 jasar jigit Baýbek Iliiasov osylai dedi, dep habarlaidy QazAqparat tilshisi.
Onyń aitýynsha, júgirýmen, sporttyń basqa da túrlerimen turaqty ainalysýdyń mańyzy zor.
- Elbasy bastap bergen Jastar jylynda aldyma úlken maqsattar qoiyp otyrmyn. Salaýatty ómir saltyn ustanyp, sportpen shuǵyldaný arqyly kez kelgen aýrýdy jeńýge bolatynyn dáleldegim keledi. Júgirýden basqa aptasyna úsh ret muzdai sýǵa túsemin, fýtbolmen, temir kóterýmen ainalysamyn, bos ýaqytymda bileimin, sýret salamyn. Oral munai, gaz jáne salalyq tehnologiialar kolledjin bitirdim, qazir zańgerlik mamandyqqa syrttai oqyp júrmin. Ázirde dúkende satýshymyn. Uzaq qashyqtyqtarǵa júgirýge áýelden den qoiyp edim. Buǵan deiin Oral qalasynda ótken jartylai marafonda (21 km) birinshi orynǵa ie boldym, - deidi Qaztalov aýylynda turatyn B.Iliiasov.
- Baýbek, jýyrda 20 gradýs aiazda Qaztalov pen Jalpaqtal aýyldarynyń arasyn (60 km) 5 saǵat 20 minýtta júgirip ótipsiń, ózińdi baiqap kóreiin dediń be?
- Iá, qystygúni aiazda júgirý ońai emes eken. Bastapqyda júreksingenimmen, márege jettim. Bul bastamasy ǵana. Mundaǵy maqsat - ózim quralpy jastar kórip, úlgi alsyn degendik. Olar da sportpen dendep ainalyssa deimin. Endi aldaǵy ýaqytta aýyldyq okrýgterdi júgirip ótip, 100 kilometrdi baǵyndyrǵym keledi. Biyl sondai-aq Almaty qalasynda kóktemde ótetin marafonǵa (42,2 km) qatyssam ba dep otyrmyn.
- Eń bastysy, adam ózine senýi kerek deisiń ǵoi?
- Iá, árine! Bizdiń elimizde jastarǵa udaiy qoldaý kórsetilip keledi. Endeshe, oǵan jaýap retinde árkim óziniń jany da, táni de saý bolýy úshin alǵa umtylýy kerek. "Sport pen eńbek - bárin de jeńbek" dep aitar edim. Jas urpaq myqty bolsa, memleketimizdiń de irgesi beki túsip, mártebesi ósip, aspandai túseri sózsiz.
