29 tamyz kúni Qazaqstan Respýblikasy Ulttyq ulanynyń Bas qolbasshylyǵynda Ata Zań kúnine arnalǵan merekelik shara ótti. Saltanatty jiynǵa Ulttyq ulan Bas qolbasshylyǵynyń jeke quramy, Aýǵan jáne Uly Otan soǵysy, ásker ardagerleri qatysty, dep habarlaidy "Ult aqparat" Ulttyq ulan baspasóz qyzmetine silteme jasap.
Shara barysynda jeke quram ortalyq orkestrdiń súiemeldeýimen Memlekettik ánurandy shyrqady. Ulandyqtardy Ata Zańymyzdyń qabyldanǵanyna jiyrma bir jyl tolýymen Bas qolbasshynyń tárbie jáne áleýmettik-quqyqtyq jumystar jónindegi orynbasary general-maior Muhametqali Satov quttyqtady. «Konstitýtsiia – qabyldanǵan kúnnen bastap, kópultty halqymyzdyń tatýlyǵy men turaqtylyǵyna tuǵyr bolyp keledi. Biz Bas qujattyń arqasynda elimizdiń irgesin bekittik, damýdyń jańa kezeńine tústik. Konstitýtsiia elimizdiń úzdiksiz ósýine kepil bolǵan barsha zańdarymyzdyń qainar kózi, bastaý bulaǵy. Quqyqtyq tártip áskeri Qazaqstan Respýblikasynyń Konstitýtsiiasy júktegen talaptar men mindetterdi múltiksiz oryndap keledi. Jaýyngerlerimizdiń Táýelsizdik týyn odan ári de biik ustaitynyna senim mol» dedi áskerdiń bas tárbieshisi.
Qyzmettik mindetterin adal atqaryp, úzdik jetistikterge qol jetkizgen áskeri qyzmetshiler Ishki ister ministriniń jáne Ulttyq ulan Bas qolbasshysynyń buiryǵymen marapattalyp, syi-qurmetke bólendi.
Al Otan, birlik, patriotizm, el qorǵaý, beibitshilik taqyrybynda ázirlengen Ulttyq ulan Án-bi ansambliniń kontserttik baǵdarlamasy merekelik kóńil-kúige shyrai qosty.
Qazaqstan Respýblikasy Ulttyq ulanynyń memlekettiń qaýipsizdigi jolynda, Ata Zańymyzdan tarmaqtalǵan zań qaǵidattarynyń saqtalyp, azamattardyń bostandyǵy men quqyqtaryn qylmystyq jáne quqyqqa qarsy áreketterden qorǵaýda sińirip otyrǵan úlesi ólsheýsiz.
.jpeg)