Jyl saiyn Qazaqstanda óz mindetin durys atqarmaǵan myńǵa jýyq adam ata-analyq quqyǵynan aiyrylady, dep habarlaidy QazAqparat.
Bul týraly QR IIM Ákimshilik politsiia komiteti Iývenaldy politsiia basqarmasynyń basshysy Áset Ospanov aityp berdi.
«Ata-ana quqyǵynan aiyrý - bir kúndik jumys emes, uzaq protsess. Onyń basty sebebi - ata-ananyń óz mindetin durys atqarmaýy. Iaǵni, olar bala tárbiesimen ainalyspaidy, balaǵa nemese jasóspirimge otbasynda qysym men zorlyq-zombylyq kórsetedi, balanyń ata-anasy ishimdik qoldanady jáne basqalar. Osy atalǵan teris áreketterdiń barlyǵy balanyń durys damýyna keri áserin tigizedi.Sonyń saldarynan jyl saiyn Qazaqstanda 1000-ǵa jýyq ata-ana óz quqyǵynan aiyrylady» - dedi Á. Ospanov Ortalyq kommýnikatsiialar qyzmetinde ótken baspasóz máslihatynda.
Basqarma basshysy ata-ana quqyǵynan aiyrý protsesiniń qalai júretinin baiandady.
«Eń aldymen óz mindetin durys atqarmai júrgen ata-analardy esepqe qoiamyz. Sol otbasymen profilaktikalyq jumys istep, turǵylyqty úi jaiyn tekseremiz. Tiisti jumystardan soń olarmen jeke áńgimelesip, ata-analarǵa nusqaýlyq beriledi. Kelesi kezeń - Ákimshilik quqyq buzý kodeksiniń 127-baby boiynsha (ata-analyq mindetin oryndamaý) jazaǵa tartylady. Osyndai jumystardan nátije shyqpasa, bul otbasynyń máselesi arnaiy komissiiada qaralyp, komissiia sheshimimen ata-ana óz quqyǵynan aiyrylady», - dedi ol.
Buǵan deiin Á. Ospanov Qazaqstanda kámelet jasyna tolmaǵan qansha jasóspirimniń jazasyn ótep jatqanyn aitty.
