Foto: tengritravel.kz
Almaty oblysynda joǵalǵan otbasyn izdeý jumystary sátti aiaqtaldy, dep habarlaidy "Ult aqparat" jergilikti Tótenshe jaǵdailar departamentine silteme jasap.
3 qańtar saǵat 20-30-da Respýblikalyq jedel-qutqarý jasaǵy tobynyń jáne Qonaev qalasy jedel-qutqarý jasaǵynyń kúshimen Bartoǵai sý qoimasy jaǵynan Fesenkov atyndaǵy Astrofizika institýtynyń observatoriiasyna jetpei 40-qa jýyq avtomashina tabylǵan. Adamdardyń sany anyqtalyp jatyr, aldyn ala málimet boiynsha zardap shekkender joq.
Joǵalyp ketken 7 adamnan turatyn otbasy da sol jerde júrgen. Kóbiniń mashinasynda janarmai taýsylyp qalǵan.
Qazir qutqarýshylardyń kúshimen avtokólikterge janarmai quiý jáne adamdardy mashinalarymen kolonna arqyly evakýatsiialaý jumystary júrgizilip jatyr. Respýblikalyq jedel-qutqarý jasaǵynyń ekinshi toby Túrgen-Batan-Observatoriia jolymen birinshi topqa qarsy júrip keledi.
Esterińizge sala keteiik, 3 qańtarda saǵat 08:00-de Almaty oblysy Tótenshe jaǵdailar departamenti kezekshi bóliminiń pýltine Eńbekshiqazaq aýdanyndaǵy Shelek aýylynan 80 shaqyrym jerde, taýly aimaqtaǵy Bortoǵai sý qoimasynda 7 adamnan turatyn otbasy (tórt er adam, eki áiel adam jáne bala) joǵylyp ketkeni týraly habarlama kelip túsken. Olar 2 qańtarda eki kólikpen Almatydan Asy qyratyna qarai shyǵyp, úilerine oralmaǵan. Joǵalyp ketken adamdar TJM-nyń birneshe márte aitqan usynymdaryna qaramastan, josparlanǵan týristik marshrýty týraly oblystyq TJD-ne aitpaǵan.
Joǵalǵan adamdardy izdeý jumystaryn Tótenshe jaǵdailar departamenti, Respýblikalyq jedel-qutqarý jasaǵy ótimdiligi joǵary tehnikamen, sondai-aq jergilikti atqarýshy organdar, aýdandyq ishki ister bólimi men volonterler júrgizdi, sonymen qatar dron jumyldyryldy.
Odan bólek, saǵat 15-00-de áýe kemesin tartý josparlanǵan, alaida aýa-raiynyń qolaisyzdyǵyna bailanysty áýe kemesin tartý múmkindigi bolmaǵan.
Joǵalǵan adamdar izdeý tobyna qarai baiaý júrip, spýtniktik bailanys baǵytyn úilestiredi. Saǵat 20-30-da eki top kezdesken. Adamdardyń ómiri men densaýlyǵyna qaýip joq.
