Nur-Sultan qalasynyń Triatlon saiabaǵyndaǵy ózen jaǵasynda balyq qyryldy. Ol týraly qala turǵyny málim etip, ákimdik bolǵan jaitqa qatysty túsinik berdi, dep habarlaidy QazAqparat.
«Ýyldyryq shashý kezeńine bailanysty ózendegi balyq sany edáýir ósti. Sol sebepten ózen jaǵajaiy aýmaǵyndaǵy torly qorshaýlarǵa balyqtar qystyrylyp qaldy. Qazirgi ýaqytta Triatlon saiabaǵynda qaita jóndeý júrgizilip, balyqtardyń kedergisiz qozǵalysyn qamtamasyz etý úshin basqa tor qoiyldy», - delingen elordanyń Almaty aýdany ákimdigi bergen jaýapta.
Aita ketsek, astana turǵyny áleýmettik jelide Triatlon saiabaǵyndaǵy tormen qorshalǵan ashyq jaǵajaida balyqtardyń qyrylyp jatqany týraly jazǵan edi.
