- Astananyń bazarlary men dúkenderinde bir keli qiiardyń baǵasy 900-2000 teńge arasynda satylyp jatyr. Tilshiler Astanadaǵy birneshe úlken sýpermarket pen «Artem» bazaryna baryp, qiiar baǵasynyń nege munsha sharyqtap ketkenin anyqtaýǵa tyrysty, - dep habarlaidy QazAqparat agenttigi.
Jalpy, dúkender men bazarlardaǵy qiiardyń kóbi Tashkentten, ońtústiktegi Saryaǵashtan jáne Aqmola oblysy Stepnogor qalasynan tasymaldanǵan eken. Biraq, ózimiz ósirgen qiiar men importtalǵan qiiardyń baǵasynda esh aiyrmashylyq joq. Astananyń qiiary importtalyp kelgen qiiardan da qymbat bolyp shyqty.
«Artem» bazaryndaǵy satýshylardyń barlyǵy qiiarǵa shamamen birdei baǵa qoiǵan jáne «nege qymbat?» degen suraqqa, «kóterme baǵamen satatyn saýdagerlerdiń baǵasy qymbat» dep jaýap berdi.
«Artem»-daǵy bir keli qiiardyń eń arzany - 900 teńge, eń qymbaty - 1500 teńge. Al, «Galmart» sýpermarketindegi «astanalyq» qiiardyń bir kelisi 1380 teńge, tashkenttik qiiar - 2040 teńge turady eken. «Small» ámbebap dúkeninde qiiardyń bir kelisi - 1310 teńgeden, «Alma» sýpermarketindegi qiiardyń bir kelisi 1461 teńgeden satylyp jatyr.
Biraq, ekzotikalyq ónim, muhittyń ar jaǵynan keletin ananas jemisiniń baǵasy búkil jerde 500-700 teńge eken.
Tilshiler anyqtaǵandai, Astanada qiiar men qyzanaq ósiretin bir ǵana jylyjai bar eken. Onyń qýattylyǵy jyl on eki ai 1700 tonna qiiar ósirýge jetedi.
Beiresmi baǵaǵa súiensek, bul jylyjai qiiardy kelisi úshin 300-400 teńge kóterme baǵamen satady. Biraq, kóbine arzan qiiardy Reseidiń meiramahanalaryna tikelei jetkizedi eken jáne de jylyjai ózi ósirgen qiiardy «Galmart», «KeńMart» jáne «Metro» dúkenderine jetkizedi.
