«Astanalyqtardyń baspana máselesin biýdjet qarjysyna, kommýnaldyq turǵyn úi qorynyń esebinen sheshý múmkin emes dep kesip aitýǵa bolady». Astana qalasy ákiminiń halyqpen eseptik kezdesýi barysynda azamattardy qabyldaǵan qala basshysynyń orynbasary Nurlan Nurkenov osylai dedi. Bul týraly ákimdik qyzmetker Jomart Aitqazy habarlady.
«Astanada kommýnaldyq turǵyn úi qorynda baspana kezeginde 45 myńnan astam adam tur. Sonyń 20 myńnan astamy – túrli áleýmettik az qamtylǵan toptar», - dedi ol.
Onyń aitýynsha, elordada turǵyn úimen qamtamasyz etý boiynsha jalǵa beriletin jáne kredittik turǵyn úi baǵyttary bar. Máselen, jalǵa beriletin turǵyn úi boiynsha ótken 2018 jyly 180 páter paidalanýǵa berilse, 2019 jyly 700-den astam páter óz iesin tabady. Kredittik turǵyn úi baǵyty boiynsha 2018 jyly 481 páter úlestirilgen bolsa, 2019 jyly 900-den astam páter paidalanýǵa berilmek.
«Demek biyl 1600-den astam otbasy baspanaly bolady. Eger osy qarqynmen kezek jyljysa, búgingi kúni kezekte turǵan 45 myńynshy turǵyn kemi 25 jyldan keiin baspanaly bolady. Turǵyn úi kezegindegilerdiń tizimi 45 myńmen toqtamaitynyn taǵy qosyńyz. Osylaisha astanalyqtardyń baspana máselesin biýdjet qarjysyna, kommýnaldyq turǵyn úi qorynyń esebinen sheshý múmkin emes dep kesip aitýǵa bolady», - dedi Nurkenov.
Endi ne istemek kerek?! Máseleni sheshýdiń qandai joldary bar, - degen azamattar saýalyna:
«Ákimdik kóptiń kókeiinde júrgen baspana máselesin sheshý mehanizmderin qarastyryp jatyr. Sonyń ishinde kezekte turǵan turǵyndardyń áleýmettik osal toptaryna belgili ýaqyttan keiin satyp alý quqyǵymen páterlerdi jalǵa berý múmkindigi usynylatyn bolady. Osy arqyly otbasy tapqan aqshasyn páter iesiniń qaltasyna emes, óz menshigine ótetin baspana úshin quiýǵa múmkindik alady», - dedi Astana ákiminiń orynbasary.
Buǵan qosa, ákimdik turǵyn úi sertifikattarynyń sanyn 100-den 2 myńǵa ulǵaitqanyn taǵy bir qaitalap ótti. Turǵyn úi sertifikattary atalǵan toptarǵa turǵyn úi alý úshin 1 mln teńge kóleminde alǵashqy sýbsidiialyq jarna retinde bólinedi. Sertifikat nesiege baspana alý úshin aldyn ala tólem qarjysy retinde qaitarymsyz negizde beriledi.
2018 jyly meditsina qyzmetkerlerine, muǵalimder pen politseilerge «7-20-25» baǵdarlamasy boiynsha 1 mln teńgelik 100 turǵyn úi sertifikaty úlestirilgen bolatyn.
Aita keteiik, Nurlan Nurkenov osy jylǵy 15 aqpanda Astana ákiminiń orynbasary qyzmetine taǵaiyndalǵan bolatyn. Ol elordanyń densaýlyq saqtaý, ishki saiasat, jastar saiasaty men aqparat, mádeniet jáne sport salasyna qatysty máselelerge jaýap beredi.
