Elorda jurty Tokio Olimpiadasynan oralǵan boksshy Vasilii Levit pen Abylaihan Júsipovti qoshemetpen qarsy aldy, dep habarlaidy QazAqparat.
Elordalyq jankúierler sportshylardy áýejaidan erekshe yqylaspen jáne gúlmen qarsy aldy. Boksshylar óz kezeginde rizalyqtaryn bildirdi.
«Barsha qoldaýshylarǵa rahmet. Jankúierlerdiń qoldaýyn sezindim, bastysy sol. Sportta jeńiske jetkende de, jeńilgende de qoldaý óte mańyzdy. Óitkeni qoldaý kórsetýdiń arqasynda jeńilistiń ashy sezimin asa sezinbeisiń», - dedi qazaqstandyq boksshy Vasilii Levit.
Sondai-aq, sportshy otbasy men jaqyndaryn qatty saǵynǵanyn jáne úiine jetkenshe asyǵyp kele jatqanyn jetkizdi.
Aita keteiik, Tokio Olimpiadasynda Vasilii Levit alǵashqy kezdesýinde ispaniialyq Emmanýel Reies Pladan nokaýtpen jeńildi.
Sonymen qatar 69 keli salmaq dárejesinde synǵa túsken Abylaihan Júsipov amerikandyq Djonson Delantemen kezdesip, 1:4 esebimen jeńildi.
