Astanalyq sáýletshi Ámir Ábilov LRT qurylysynyń ornyna tramvai qoǵamdyq kólik jelisin salýdy usyndy, dep habarlaidy QazAqparat.
Ámir Ábilov jekemenshik kompaniiada jumys isteidi jáne qurylys nysandarynyń jobasyn ázirleýmen ainalysady.
Sala boiynsha tájiribesiniń azdyǵyna qaramastan sáýletshi elordanyń sol jaǵalaýyndaǵy 5 birdei nysannyń avtory.
«Elordada metro bolsa degen bala kúngi arnanym bolǵan. Degenmen metro salý ońaiǵa soqpaitynyn bilip, tramvai kóligi esime tústi. Tramvai metro men LRT-ǵa qaraǵanda áldeqaida arzanǵa túsedi. Tramvai – ámbebap kólik jáne Eýropa elderi ony qaita jandandyryp jatyr. Tramvai kóliginiń damý tarihy ótken ǵasyrdyń 20 jyldaryna sáikes keledi. Ekinshi dúniejúzilik soǵystan keiin tramvaiǵa suranys azaiyp, jeńil avtokólik júiesi dami tústi. Adamdar mashina alyp, joldar da soǵan sai salyna bastady. 90-shy jyldary eýropalyqtar jeńil avtokólik sanynyń kóbeiýine bailanysty, joldardy keńeitý máseleni sheshpeitinin túsindi. Osylaisha adamdardy jeńil kólikten bas tartyp, qoǵamdyq kólikke otyrǵyzý ideiasy týyndady. Atalǵan ideia bir jaǵynan keptelis problemasyn sheshse, ekinshi jaǵynan qalanyń ekologiiasyn jaqsartady», - dedi Á. Ábilov.
«Men tramvai jelisiniń jobasyn ázirlep te qoidym. Ony kezeń boiynsha júzege asyrýǵa bolady. Mysaly, jańa meshitten EKSPO-ǵa deiin, Qabanbai batyr dańǵylynan Samal shaǵyn aýdanyna deiin jáne Respýblika dańǵylynan eski vokzal aýdany iaǵni Gete kóshesine deiin tramvaidy iske qosýǵa bolady. Odan ári istiń qalai júretinin qadaǵalaý arqyly kólik jelisin jetildire túsýge bolady», - deidi ol.
Sáýletshi óz jobasyn ázirleýde Batys Eýropanyń tramvai jelisin negizge alǵan.
«2007 jyly Parijde jańa tramvai jelisi salyndy. Sondai-aq, Marsel qalasynda da tramvai jelisi jaqsy damyǵan. Búginde búkil Eýropada atalǵan kólik qatynasy jelisi qarqyndy damý ústinde», - dedi maman.
