Elordadaǵy «Astana Opera» opeara jáne balet teatrynyń ártisi, prima-balerina Áigerim Beketaeva Italiia astanasy Rim tórindegi aspan asty amfiteatrda 7 myń kórermenniń aldynda óner kórsetti, dep habarlaidy QazAqparat.
«Italiiada óner kórsetý josparda bolǵan joq. Eńbek demalysymda óner kórsetý týraly usynys kelip tústi de, bir-eki kúnniń ishinde Italiiada boldym. Aiaq astynan bolǵandyqtan ashyq aspan astyndaǵy amfiteatr sahnasyna shyqqanymdy ózim de túsinbei qaldym. Men «Traviata» jáne «Aida» operasynda bileýge shaqyrdym. Eki spektakl eki retten sahnalandy. Sahnaǵa shyqpaǵaly biraz boldy, jalpy álemdik deńgeidegi sahnada óner kórsetkenime qýanyshtymyn. Teatr ishinde óner kórsetkennen ashyq aspan astynda qalyń kórermen aldynda bilegen múldem bólek. Árine qobaljý boldy, kórermenderdiń kóńilinen shyqty dep oilaimyn», - dedi Áigerim Beketaeva.
Rimdegi aspan asty amfiteatry 13 500 adamǵa arnalǵan. Pandemiiaǵa bailanysty shekteý engizilip, jerlesimiz óner kórsetken qoiylymda 7 myń kórermen bolǵan.
«Ondaǵy ujym óte tatý, biz alǵashqy kúnnen til tabysyp, dostasyp kettik. Jumys barysynda eshqandai kedergi bolǵan joq. Qoiylymda bishilerden bólek, opera ánshileri de óner kórsetti. Italiialyqtar úshin ónerdiń onyń ishinde opera men balettiń erekshe ekeni bárimizge belgili. Sol siiaqty maǵan sahna kostiýmderi erekshe unady, men ózimdi ertegi keiipkeri sezindim. Italiiada óner kórsetken sátti umytpaimyn, onyń ústine týǵan kúnimdi de sol jaqta qarsy aldym. Kelgennen soń áriptesterimmen alǵan áserim men tájiribemmen bólistim», - deidi ol.
