Senat depýtaty Talǵat Musabaev qyzǵa shabýyl jasady dep aiyptaldy, - dep habarlaidy "Ult aqparat" Tengrinews.kz agenttigine silteme jasap.
Nur-Sultan qalalyq politsiia departamentiniń málimeti boiynsha, oqiǵa 24 maýsymda bolǵan. Musabaev pen elorda turǵyny Alina Nurtas arasyndaǵy janjal saiabaqta bastalǵan.
"Saiabaq. Itpen júrgenmin, ol qysqa qarǵybaýǵa bailanǵan, tumyldyryǵy ózimmen birge (zań boiynsha, ol hýski tuqymdy iterde bolmaýy kerek). Serýendep júrgenmin. Bir ýaqytta bireýdiń aiǵailaǵanyn estidim. Mán bermei júre berdim. Jaqyndap kelip, taǵy aiǵailady. Murnymnyń astynan dóreki adamǵa balaǵat sóz aittym da, odan ári júre berdim. (Alina úndeme! Óziń kinálisiń! Joq, kináli emespin. Bul meniń negizsiz aiǵaiǵa reaktsiiam). Ári qarai júre berdim. Er adam burylyp, serpildi de, iyǵymnan judyryǵymen bir urdy. Qolym jansyzdanyp qaldy", - deidi qyz.
Alina Nurtastyń aitýynsha, oqiǵa ornyna politsiia shaqyrylǵan, keiin ol quqyq buzýshy senat depýtaty Talǵat Musabaev ekenin bilgen.
"Birden politsiia shaqyrdym. Sol jerde máseleni sheshýge kiristik. Biraq eshteńe dáleldei almaitynym belgili boldy. Sebebi meniń aldymda Talǵat Musabaev tur. Oǵan ne aita alamyn?", - dep jazdy Alina Instagram paraqshasynda.
Nur-Sultan politsiia departamenti bul janjalǵa Talǵat Musabaev shynymen de qatysty ekenin rastady.
"Biyl 24 maýsymynda saǵat 17: 22-de "102" arnasyna Momyshuly kóshesindegi Triatlon saiabaǵynda er adam qyzdy uryp, onymen dóreki sóileskeni týraly qońyraý tústi. Oqiǵa ornyna avtopatrýl jiberildi. Er adam men it iesi arasyndaǵy janjal úi janýaryn tumyldyryqsyz serýendetýge bailanysty shyqany anyqtaldy. Derek boiynsha tekserý júrgizilip jatyr", -dedi qalalyq politsiia departamentiniń baspasóz qyzmeti ókili.
