Astanalyq 10 jastaǵy oqýshy reseilik teleshoýdyń ádil qazylary men kórermenderin matematikalyq esepterdi oisha jyldam eseptei alatyndyǵymen tańdandyrdy, - dep habarlaidy Kaz.tengrinews.kz tilshisi.
"Rossiia 1" arnasynyń efirindegi "Ýdivitelnye liýdi" jobasynda Iliias úsh synaqtan da óte alǵan: aldymen ol birneshe sekýndta eki jáne úsh tańbaly sandy qosyp, keiin eki qos tańbaly sannyń sharshysyn, artynsha osy sandardyń sharshylarynyń aiyrmashylyǵyn shyǵaryp berdi. Kórermender balaqaiǵa aiaqtan tik turyp qol shapalaqtady. Shoý taspasy Youtube hostinginde paida bolǵanyn aita keteiik.
10 jastaǵy Iliias Toqtarhandy "kalkýliator-adam" dep ataityn kórinedi.
"Meni kalkýliator adam dep ataidy, óitkeni men oisha barlyǵynan jaqsy esepteimin. Men eki, úsh, tórt tańbaly sandardyń birneshe qataryn eseptei alamyn, eki jáne úsh tańbaly sandardy kóbeitip, bólip, sharshy túbirin shyǵaramyn. Men matematikalyq ikemim men kileń beske oqitynyma maqtanamyn", - dedi ol telejoba efirinde.
"Men jai ǵana esepter men abakýsty elestetip, esepti sheshemin", - dep túsindire ketti oqýshy óziniń erekshe qabiletin.
Onyń aitýynsha, 9 jasynda ol álemniń 52 elinen 12 myń adam qatysqan Niý-Delidegi mental arifmetikadan ótken jarysty utqan.
"Meniń bul qabiletim dúkenge barǵanda, shetelge shyqqan kezde valiýta baǵamyn kalkýliatorsyz esepteýge kómektesedi. Bolashaqta men IT mamany bolǵym keledi. 3D-oiyndarynyń baǵdarlamasyn, robottar men saittar jasap, fotoshopty bilgim keledi. Maǵan bul joba matematikalyq qabiletimdi kórsetip, barlyǵyn tańdandyrý úshin kerek", - dedi Iliias Toqtarhan.
"Ýdivitelnye liýdi" teleshoýy - 2011 jyly Germaniiada sátti bastaý alyp, Qytai, AQSh, Frantsiia, Italiia men Ispaniiany qosa alǵanda kóptegen elderge beiimdelip taralǵan he Brain shoýynyń reseilik nusqasy.
