Foto: Azattyq radiosy
Jańaózennen turaqty jumys talap etip kelip, Astanadaǵy Energetika ministrligi ǵimaratynyń aldynda narazylyq bildirip turǵan munaishylardy 11 sáýirde keshkisin politsiia men arnaiy jasaq kúshtep ustap áketti. Bul týraly Qazaqstandaǵy adam quqyǵy biýrosynyń Astanadaǵy ókili Artýr Alhastov aitty. Narazylardy ustaý sátinen Vlast internet-jýrnalynyń Telegram-arnasy video jariialady, dep habarlaidy Azattyq radiosy.
Alhastovtyń Azattyqqa aitýynsha, munaishylarǵa aldymen qala ákimdiginiń ókilderi kelip, narazylyq sharasy zańsyz ekenin eskertip, taraýdy talap etken. Al jumysshylar barar jerimiz joq degen. Biraz ýaqyttan soń arnaiy jasaq pen politsiia kelip, Energetika ministrligi aldyndaǵy narazylardyń bárin ustap áketken.
Vlast saity taratqan videoda narazylar arnaiy jasaqqa qarsylasqany kórinedi.
Keshe, 10 sáýirde Mańǵystaý oblysynan 80-nen astam adam Astanaǵa munai kompaniiasynan jumys talap etip kelgen. Olar Energetika ministrligi keńsesiniń aldynda túnep shyqqan. Jańaózendikterge ministrlikten eshkim shyqpaǵan.
Narazylar "QazMunaigaz" ben "Ózenmunaigazǵa" qyzmet kórsetetin "BerÁli Mańǵystaý Company" kásipornynda jumys istegen. Taiaýda olar jumystan qysqaryp qalǵan. Sebebi "QazMunaiGaz" uiymdastyrǵan tenderde "BerÁli Mańǵystaý Company" jeńilip, "Kezbi" jáne Ai-Bis kompaniialary jeńgen.
"QazMunaiGaz" kompaniiasy narazylarǵa jalaqylaryn saqtai otyryp, "Kezbi" jáne Ai-Bis kompaniialarynan jumys usynǵan. Alaida narazylar bul usynysqa kelispei, "toǵyz aidan soń taǵy tender ótip, taǵy da jumyssyz qalamyz, bizge turaqty jumys kerek" degen edi.
11 sáýirde keshkisin Májilis depýtattary Ermurat Bápi, Maqsat Tolyqbai jáne Rinat Zaiytov ministrlik aldyndaǵy narazylarǵa barǵan. Narazylardyń biri depýtattarǵa "Jańaózenge kelip, aýyldy aralańdar, shirip jatyr" dep jaǵdailary nashar ekenin aitqan. Al Zaiytov narazylarǵa "másele kabinette sheshiledi, biraq bul jerde turǵany protsesti jyldamdatady" degen.
Eskertý: videolar Vlast internet-jýrnalynyń Telegram-arnasynan alyndy
