Altai Kólginov elordadaǵy Táýelsizdik dańǵyly boiyndaǵy kólik kópiriniń qurylysy nelikten uzaqqa sozylǵanyn túsindirdi, dep habarlaidy QazAqparat.
«Kópir salý jobasy nege eki jylǵa sozyldy? Sebebi eki merdiger 1,5 jyl boiy sottasty. Al qala turǵyndary bul kópirdi kútip otyrdy. Biz biznestiń múddesin de eskerýge tyrystyq. Degenmen sońynda kópir qurylysyna jariialanǵan baiqaýdy toqtatyp, ony qaita jariialaýǵa týra keldi. Osy aralyqta infliatsiia deńgeii ósti, metall konstrýktsiialary qymbattady. Osyǵan bailanysty bul jobany qaita qarap, túzetýler engizdik», - dep túsindirdi qala ákimi Altai Kólginov.
Eske salaiyq, Táýelsizdik dańǵyly boiyndaǵy Esil ózeni arqyly ótetin kópir salynatyny týraly 2018 jyly belgili bolǵan edi. Al onyń qurylysy 2019 jyly bastalýy tiis bolatyn. Ol áli tolyq salynyp bitken joq.
