«Astana REK» elorda turǵyndarynan boran saldarynan týyndaǵan qolaisyzdyq úshin keshirim surady, dep habarlaidy QazAqparat.
Bul týraly Aqmola oblysynyń Tótenshe jaǵdailar departemintiniń baspasóz qyzmeti málimet berdi.
«Ekpindi jel men tolassyz jaýyn-shashynnyń saldarynan 10 kV kerneýli elektr jelilerinde 30 tehnologiialyq aqaý oryn aldy. Onyń ishinde «Astana-REK» aktsionerlik qoǵamyna qaraityn jelilerde 20 aqaý boldy.
Qazir 18 aqaý joiyldy. Qalǵan 2 aqaýdy joiý jumystary júrip jatyr. Apattyń saldaryn joiyp, qalpyna keltirý jumystaryna 19 brigada, arnaiy tehnika men dizeldi generator jumyldyryldy. Elektrmen jabdyqtaý qyzmeti tolyqtai qalpyna kelgenshe jumys táýliktik rejimde jalǵasady», - dep jazylǵan kompaniianyń baspasóz qyzmeti usynǵan aqparatta.
Kásiporynnyń málimeti boiynsha, aqaýlardyń basty sebebi – qolaisyz aýa raiy.
«Jelige bógde zattardyń túsýinen qysqa tuiyqtalý bolyp, symdar úzilgen, kábil jelisiniń mýftalary isten shyqqan. Elektr qýatyn tutynýshylardyń elektr qondyrǵylarynda qorektendirýshi jelini ajyratýǵa ákep soqqan zaqymdanýlar da oryn alǵan. Qalyptasqan qolaisyzdyqtar úshin keshirim ótinemiz jáne túsinistikpen qaraýdy suraimyz», - dep jazady «Atana REK» AQ baspasóz qyzmeti.
Elektr jelisiniń ajyratylýy kóbinese Lesozavod, Kirpichnyi, Óndiris shaǵyn aýdandaryndaǵy jeke sektorda bolǵan.
«Aqaýlar joiylǵannan keiin elektrmen jabdyqtalmaǵan tutynýshylardyń jabdyqtaryn qosý týraly ótinimderdi jedel-dispetcherlik qyzmettiń myna telefondary boiynsha berýge bolady:
• 620 456 (dybystyq meniý boiynsha 6-pozitsiia):
• 79 69 44, WhatsApp: +7 701 081 6562
• Baiqońyr, Saryarqa aýdandary: 620 468;
• Almaty, Esil aýdandary: 620 438, WhatsApp +7 778 132 3306», - delingen málimette.
