Foto: akorda.kz
Astanada jedel járdem qyzmetkerine shabýyl jasaǵan er adamǵa qatysty sot úkimi shyqty. Ol meditsina qyzmetkerine kúsh qoldanǵany úshin kináli dep tanyldy. Bul – Qylmystyq kodekstiń jańa baby boiynsha qaralǵan alǵashqy isterdiń biri, dep habarlaidy Ult.kz.
Oqiǵa 2026 jylǵy 13 naýryzda bolǵan. Jedel járdem brigadasy saýda ortalyǵyna eki mas er adamǵa shaqyrtý boiynsha barǵan. Olardyń biri ózin nashar sezingenin aityp, meditsinalyq kómek suraǵan.
Meditsinalyq kómek kórsetilgennen keiin brigada ketýge daiyndalyp jatqan kezde, er adamdardyń biri feldsherge qol kótergen.
Sot materialdarynda onyń áreketi meditsina qyzmetkerine fizikalyq aýyrsyný keltirgenimen, aýyr dene jaraqatyna ákelmegeni kórsetilgen. Sonymen qatar bul áreket meditsinalyq kómektiń qaýipsiz kórsetilýine kedergi keltirip, meditsina qyzmetkeriniń quqyqtaryn buzǵan.
Sottalýshy kinásin moiyndap, bas bostandyǵynan aiyrmaýdy surady. Al jábirlenýshi qatań jaza taǵaiyndaýdy talap etti. Prokýror 1 jyl 6 ai bas bostandyǵynan aiyrý jazasyn suraǵan.
Sot onyń buryn sottalmaǵanyn, biraq qoǵamdyq tártipti buzǵany jáne qoǵamdyq oryndarda ishimdik ishkeni úshin birneshe ret ákimshilik jaýapkershilikke tartylǵanyn eskerdi.
Jeńildetetin mán-jai retinde – shyn júrekten ókinýi, al aýyrlatatyn jaǵdai retinde – qylmystyń mas kúiinde jasalýy tanyldy.
Sot ony QR QK-niń 380-3-baby 3-bóligi boiynsha kináli dep tanyp, 1 jyl 6 aiǵa bas bostandyǵynan aiyrý jazasyn taǵaiyndady. Sottalýshy jazasyn qaýipsizdigi tómen mekemede óteidi. Úkim zańdy kúshine engen joq.
