Foto: Astana qalalyq ákimdigi
Elordada 18 naýryzdan beri veip pen nasybaidyń zańsyz taralýy men qoldanylýyn anyqtaý boiynsha reidter jalǵasyp jatyr. Reidtik is-sharalar bastalǵannan beri 800-ge jýyq saýda orny tekserildi, dep habarlaidy "Ult aqparat" Astana qalalyq ákimdiginiń baspasóz qyzmetine silteme jasap.
Málim bolǵandai, shegilmeitin temeki ónimderin, onyń ishinde nasybai óndirisi boiynsha jerasty tsehtaryn izdeý barysynda 160-tan astam fakt anyqtalǵan.
Aktsiianyń maqsaty – veipke, temeki ónimderine jáne nasybaiǵa táýeldi elorda turǵyndarynyń sanyn azaitý.
Reidke belgili MMA jaýyngeri, kóptegen halyqaralyq týrnirlerdiń jeńimpazy Vasilii Tahtai qatysty.
«Biz biletindei, búgingi tańda temeki ónimderi men nasybaidy paidalaný bizdiń qoǵamda ózekti másele bolyp sanalady. Búginde kámeletke tolmaǵandarǵa nasybai men basqa da temeki ónimderin zańsyz satýdy anyqtaý maqsatynda reid júrgizilýde. Bizdiń maqsatymyz – bul máseleni joiý jáne jastardy salaýatty ómir saltyna baǵyttaý», - dedi Vasilii Tahtai.
Is-shara barysynda dúken satýshylaryna profilaktikalyq túsindirý jumystary júrgizildi.
«Osy jyldyń 18-29 naýryzy aralyǵynda biz nasybai men temeki ónimderin zańsyz satýdy anyqtaý boiynsha reid júrgizip jatyrmyz. Is-shara barysynda Asfendiiarov, Ánet baba, Syǵanaq, R.Baǵlanov, Uly dala, Qaiym Muhamedahanov, Otyrar jáne Úrker turǵyn alaby, Isatai batyr kóshelerinde ornalasqan 147 dúken boiynsha nasybai men sniýsti zańsyz satý boiynsha profilaktikalyq túsindirý jumystary júrgizildi. Nátijesinde 6 dúken ákimshilik quqyq buzýshylyq týraly kodekstiń (ÁQBtK) 196-babyna sáikes 25 ailyq eseptik kórsetkish mólsherinde aiyppul salýmen ákimshilik jaýapkershilikke tartyldy», - dedi Nura aýdany ákimi apparatynyń kásipkerlik bóliminiń mamany Bektemir Joldasqajiev.
Esterińizge sala keteiik, Memleket basshysy Qasym-Jomart Toqaev 2024 jylǵy 15 naýryzda Ulttyq quryltaidyń úshinshi otyrysynda Esirtki men qazaqstandyqtardyń densaýlyǵyna ziiandy basqa da zattardyń ziiany týraly aitqan bolatyn.Nasybai men sniýstiń zańsyz taralýyn anyqtaý boiynsha reidter elordanyń barlyq aýmaǵynda júrgizilip jatyr.
