Búgin Astanada ashylǵan «Allanyń gúli» kesheniniń sáýletshisi Saǵyndyq Janbolatov onyń negizgi erekshelikterin aityp berdi, dep xabarlaidy QazAqparat tilshisi.
«Bul meshittiń formasy Qazaqstandaǵy birde-bir meshitke uqsamaidy. Ishi de ózgeshe. Mixraby qabyrǵadan beri qarai ornalasqan. Al energiia tutyný jaǵynan álem boiynsha biregei nysan bolyp sanalady. Sebebi energiiany tolyǵymen kúnnen alady. Artyq energiiany da óndirýge múmkindik bar. Ony qalaǵa satyp, jylyna 4 mln teńge paida kórýge bolady. Bunyń barlyǵy - Astanadaǵy EKSPO kórmesiniń nátijesi», - deidi S.Janbolatov.
Onyń aitýynsha, jańa meshitke 750 adam siiady. Degenmen, namaz kezinde qatarǵa turǵanda, oǵan bir myńnan astam adam kire alady.
«Meshit jyly. Edendi arnaiy jylytý júiesi tartylǵan. Ishki sáýleti de airyqsha, avangard úlgisinde jasalyp otyr. Biz ony «jańa qazaq» stili dep ataimyz», - dep atap kórsetti S.Janbolatov.
Aita keteiik, búgin Astanada jańa úlgidegi meshit ashyldy. Nysannyń ashylý rásimine QR Prezidenti Ákimshiligi, Úkimet pen Parlament músheleri qatysty. Meshitke Yryskeldi qajynyń aty berilip otyr.
QazAqparat tilshisine suxbat bergen meshittiń bas imamy Jaqiia qajy Ismailov intererde oiý-órnek pen jazýlardyń azdyǵyn túsindirdi.
«Meshittiń syrtqy sáýleti erekshe bolyp shyqty. Munaranyń ústinen qaraǵanda meshit gúlge uqsaidy. Búginde ony halyq arasynda «Allanyń gúli» dep atap ketti. Meshittiń taǵy bir ereksheligi - ishi qarapaiym. Qabyrǵalary appaq, kóp jazýlar joq. Kúmbezdiń ainalasynda ǵana Alla taǵalanyń toqsan toǵyz aty jazylǵan. Basqa jerinde adamnyń oiyn alyp ketetin eshqandai áshekei de, oiý-órnek te joq. Ol da - jańa meshittiń ereksheligi. Meshittiń mixraby da ózgeshe salyndy. Olai istegen shariǵatqa qaishy emes. Sosyn jańa nysan tolyǵymen otandyq materialdardan salynyp otyr», - deidi Jaqiia qajy.
