Astanada QR Prezidenti Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda aitylǵan mindetterdiń biri - «Jahandaǵy zamanaýi qazaqstandyq mádeniet» jobasy boiynsha qurylǵan jumys tobynyń otyrysy ótti, dep habarlaidy "Ult aqparat".
Jiyn barysynda QR Prezidenti ákimshiligi Ishki saiasat bóliminiń meńgerýshisi Aida Balaeva búgingi kúni 4 negizgi baǵyt (ádebiet, teatr jáne kino, klassikalyq jáne dástúrli mýzyka, beineleý óneri) boiynsha zamanaýi mádeniettiń eń úzdik hám ozyq týyndylaryn irikteý jáne júieleý jumystary bastalyp ketkenin aittty.
Irikteý jumystary aiaqtalǵan soń, úzdik shyǵarmalardyń qysqa-tizimi jasalatyny anyqtaldy. Onda avtorlardyń memlekettik, qoǵamdyq jáne halyqaralyq syilyqtardyń iegeri bolýy, halyqaralyq festivalder men ózge de belgili konkýrstarǵa qatysqandyǵy negizge alynady.
Jumys tobynyń múshesi, aqyn Nesipbek Aituly: "Bizge osyndai sarapshylar tobyn jasaqtaǵan abzal. Tańdaý jumystarynan keiin iske aýdarma salasyndaǵy kásibi mamandardy da tartqan jón. Óitkeni biz avtorlarymyzdyń shyǵarmalaryn jańa deńgeige, ózge masshtabtarǵa shyǵarýymyz kerek qoi. Olardy kúlli álemge tanystyrýymyz tiis, tiisinshe, sol arqyly biz ádebietimiz men mádenietimizdi nasihattaimyz", - dep, bastamanyń qajettiligi men mańyzdylyǵyn tilge tiek etti.
Óz kezeginde, Ǵ.Jubanova atyndaǵy Memlekettik shekti aspaptar kvartetiniń kórkemdik jetekshisi Ernar Myntaevtyń aitýynsha, «Jahandaǵy zamanaýi qazaqstandyq mádeniet» jobasy talantty avtorlar men kompozitorlardyń, olardyń shyǵarmalarynyń shet memleketterde tanylyp, áigili bolýyna jol ashpaq.
Aita keteiik, týyndylardy irikteý 3 kezeń boiynsha júzege asyrylmaq. Týyndylarǵa tiisti saraptama men irikteý júrgizilgen soń, jumystardyń tizimi jumys tobynyń jalpy otyrysynda talqylanyp, Ulttyq komissiianyń qaraýyna, bekitýine jiberiledi.
