Astanada zergerlik dúkenniń kúzetshisi qatelesip kúmisten jasalǵan 2,5 mln teńgeniń avtorlyq áshekeilerin qoqysqa tastaǵan.
Dúken kúzetshisi salmaǵy 5 keli bolatyn zergerlik buiymdardy baiqaýsyzda qoqysqa laqtyryp jibergen.
"Bizdiń dúkenniń 8 qalada bólimshesi bar. Almatydan qazaqy oiý-órnegi bar bilezikter jibergen bolatyn. Ony Aqtaýdaǵy bólimshemiz — "Qazaq áshekeileri" dúkenine jiberýimiz kerek-tin. Dúkende qoqys salynǵan jáshik turǵan. Men oǵan eki kún boiy qoqys saldym. Men shyǵyp ketkende aǵam ishindegi qoqysty alyp tastap, onyn ornyna zergerlik buiymdary bar paket salyp qoiǵan eken. Men ony bilmesten qoqys konteinerine aparyp saldym", — dedi Elorda Info tilshisine dúkenniń kúzetshisi Jandos Ámirhanov.
Qoqystyń ornyna zergerlik buiymdardy laqtyryp jibergenin kúzetshi bir saǵattan soń biraq bilgen.
"Aǵam kelip "kúmis bilezik salynǵan qorapsha qaida?" dep surady. Ózimniń qatelesip qoqystyń ornyna bilezikterdi laqtyryp jibergenimdi sol kezde baryp biraq bildim. Júgirip qoqys konteinerine barsaq tazalyqpen ainalysatyp kommýnaldyq uiymnyń kóligi kelip tur eken. Biraq turmystyq qaldyqty artyp úlgermepti. Qoqysty qoparǵanda ózim shyǵarǵan jáshikti taptym. Alaidy ishindegi zergerlik buiymdar salynǵan paketter joq. Bizdiń oiymyzsha ony turǵylyqty jeri joq adamdar, iaǵni bomjdar alyp ketti", — deidi kúzetshi.
Onyń aitýynsha, bilmestikpen keltirilgen zalaldyń kólemi 2,5 mln teńgeni quraidy. Búgingi kúni dúkenniń basshylyǵy politsiiaǵa aryz jazdy.
"Ainaladaǵy beinebaqylaý kameralaryn qarap shyqtyq. Ol jerde kamera az emes, biraq qoqystyń mańaiyn birde-bir kamera túsirmeidi eken", —dedi ol.
Jas jigit zergerlik buiymdardyń tabylatynyna úmittenip otyr.
"Men ol áshekeilerdiń tabylatynyna senimdimin. Sebebi ondai zergerlik buiymdar tek tapsyryspen jasalady, iaǵni ol eksliýzivti zat bolyp tabylady. Buǵan qosa tergeýshilerdiń aitýymen áleýmettik jelilerge habarlama jazdym. Taýyp alyp, habarlasqan adamǵa syiaqy beriledi", — dedi Ámirhanov.
