Foto: Maksim Stýlov / Vedomosti
Elordada turǵyn úi qurylysynyń qarqyny azaia ma? Bul saýal Úkimet úiiniń kýlýarynda Astananyń eks-ákimi, Premer-ministrdiń orynbasary Altai Kólginovke qoiyldy, dep habarlaidy QazAqparat.
«Qalalyq máslihat halyqty sýmen qamtý máselesin sheshý maqsatynda jańa turǵyn úiler qurylysyna tyiym salmaq. Másele máslihat otyrysynda talqylandy. Osyǵan qatysty sizdiń pikirińiz qandai?» dep surady tilshiler.
«Bul jerde áńgime tyiym salý emes, turǵyn úi qurylysy qarqynyn azaitý týraly shyǵar. Biraq, qarqyndy birden tómendetip jiberýge bolmaidy, bul jaǵyn biz ákimdikpen talqylaǵanbyz. 2020 jyly ákimdik aldynda 3 mln sharshy metr turǵyn úi salý mindeti turdy, ol artyǵymen oryndaldy. 2021 jyly 3 mln 200 myń sharshy metr turǵyn úi turǵyzyldy. Kórsetkishti 3,5 mln sharshy metrge arttyrý týraly áńgime qozǵalǵanda biz qarsy boldyq. Bul jerde túzetýler kerek», - dep jaýap berdi Premer-Ministrdiń orynbasary.
Onyń aitýynsha, turǵyn úiler aldymen qajetti infraqurylymmen (sý, jylý, jol jáne t.b.) qamtylýy kerek.
«Sondyqtan da, jańa jylý ortalyqtarynyń qurylysy bastaldy. Sonymen qatar, tabiǵi gazben qamtý qatar júrip jatyr. Odan bólek, elektr energiiasy stansasyn salý qajet jáne káriz qubyrlaryn tartý kerek. Osy máseleler sheshilgennen keiin baryp, turǵyn úiler qurylysynyń qarqynyn ulǵaitý týraly sóz qozǵaýǵa bolady. Degenmen, baspanaǵa suranys joǵary, ásirese qoljetimdi jáne áleýmettik», - dep tolyqtyrdy Altai Kólginov.
