Foto: Inform.kz
Astanadaǵy Nazarbaev Ýniversitetinde Qytai Halyq Respýblikasynyń Tóraǵasy Si Tszinpinniń «El basqarý jóninde» atty tórt tomdyq kitabynyń tusaýkeseri ótti, dep habarlaidy Ult.kz.
Is-sharaǵa Qazaqstan Respýblikasynyń Mádeniet jáne aqparat ministri Aida Balaeva, Qytai Kommýnistik partiiasy Ortalyq komitetiniń úgit-nasihat bólimi meńgerýshisiniń orynbasary Hý Hepin, QHR Ult isteri jónindegi komitet tóraǵasynyń orynbasary Go Veipin, QHR Shetel ádebietin basyp shyǵarý jáne taratý jónindegi bas basqarmasynyń jetekshisi Dý Chjaniýan, sondai-aq Qazaqstan Respýblikasyndaǵy QHR-dyń Tótenshe jáne Ókiletti Elshisi Han Chýnlin qatysty.
Jiyn barysynda Aida Balaeva eki el arasyndaǵy mádeni yntymaqtastyqtyń mańyzyn atap ótti.
«Qytai – Qazaqstan úshin senimdi dos, odaqtas ári strategiialyq seriktes. Eki el arasyndaǵy ǵasyrlar boiǵy dostyq, ózara qurmet pen senimge negizdelgen yntymaqtastyq búginde barlyq baǵytta tabysty damyp keledi.
Memleketterimizdiń basshylary arasyndaǵy ózara túsinistik pen joǵary deńgeidegi senim – ekijaqty qarym-qatynastardyń nyǵaiýyna zor yqpal etýde. Bul kitap – Qytai memleketiniń saiasi baǵyt-baǵdaryn, ulttyq birlik pen turaqtylyqty qamtamasyz etýdegi ustanymdaryn, sondai-aq uzaqmerzimdi strategiialyq maqsattaryn túsinýge umtylatyn qazaqstandyq oqyrman úshin qundy derekkóz bolmaq.
Sonymen qatar, týyndy – Qytaidyń halyqaralyq arenadaǵy ustanymdary men rólin saralaýǵa múmkindik beretin mańyzdy eńbek», – dedi Aida Balaeva.
Kitap Qytai Halyq Respýblikasyndaǵy memlekettik basqarý filosofiiasy men tájiribesine arnalǵan. Onda QHR basshysynyń ishki jáne syrtqy saiasat, ekonomikalyq jáne áleýmettik damý strategiialary jónindegi kózqarastary qamtylǵan. Basylym saiasattanýshylarǵa, halyqaralyq qatynastar salasynyń mamandaryna, Aziia elderiniń damý jolyna qyzyǵatyn mamandarǵa, sondai-aq qytai tili, mádenieti men qoǵamdyq qurylymyn zertteitin ǵalymdarǵa arnalǵan.
