8-9 qazan kúnderi «Qýatty aimaq – qýatty Qazaqstan» aktsiiasynyń aiasynda, El Táýelsizdiginiń 25-jyldyǵyna orai Astana qalasynda Shyǵys Qazaqstan oblysynyń kúnderi ótedi. Elordalyqtar men qala qonaqtarynyń nazaryna usynylǵan kórmeler, spektaklder, kontsertter men aýylsharýashylyq ónimderiniń jármeńkesi Kendi Altaidyń egemendik alǵan jyldarda ekonomikalyq jáne mádeniet salalarynda qol jetken jetistikterin pash etedi.
Merekelik baǵdarlamalardyń shymyldyǵy Ulttyq murajaiynda qoiylǵan shyǵysqazaqstandyq sýretshilerdiń «Ýaqyt portretine shtrihter» kórmesi jáne «Úlken joldyń kezeńderi» fotoekspozitsiiasy, «Táýelsizdiktiń jarqyn jetistikteri: Shyǵys Qazaqstan» atty kitap kórmesimen túriledi.
Teatr óneriniń jankúierleri Abai atyndaǵy teatrdyń «Diadiýshkin son» jáne oblystyq drama teatrdyń «Juldyzdy sát» qoiylymdaryn tamashalaidy. Osy kúni «barys» hokkei klýbynyń beldi oiynshysy, shyǵysqazaqstandyq Talǵat Jailaýov «Qazaqstan» sport saraiynda balǵyndar úshin sheberlik synyptaryn uiymdastyrady.
«Kórme» kórme ortalyǵynda eki kún qatarynan Shyǵys Qazaqstan oblysynyń jetistikteri men ónimderiniń «Beibitshilik pen jasampazdyqtyń 25 jyly» atty keń aýqymdy ekspozitsiiasy qyza túsedi. Aimaqtyń tarihi jáne mádeni erekshelikterinen syr shertken kórmede qonaqtar sonymen qatar óńirde shyǵarylatyn ónerkásiptik jáne aýylsharýashylyq ónimderimen, oblystyń týristik klasteriniń damý baǵytymen jáne qolǵa alynǵan innovatsiialyq jobalarmen tanysa alady.
8-9 qazanda «Han shatyr» saýda ortalyǵynyń aldyndaǵy alańda uiymdastyrylǵan «Qazaqstanda jasalǵan» aýylsharýashylyq jármeńkesinde shyǵysqazaqstandyq fermerler ózderiniń sharýashylyq qojalyqtarynda óndirgen ekologiialyq taza, sapasy joǵary ónimderin usynady. Astanalyqtar men qala qonaqtary úshin 42 tonna jylqy eti, 8 tonna qus eti, 10 tonna sút ónimderi men ósimdik maiy, 7 tonna kolbasa ónimderi men konserviler, 11 tonna balyq, 30 tonna bal, 6 tonna qymyz ben krýpalar, 55 tonna baqsha ónimderi, 107 tonna kókónister men 8 tonna kartop jetkiziledi. Osyndai berekeli kúzdiń bai ónimderimen qosa buǵy ónimderi men qaraǵai jańǵaqtary da bar.
Ámire Qashaýbaev atyndaǵy oblystyq memlekettik filarmoniianyń eki kúnge sozylatyn kontserti kórermenderge kóterińki kóńil-kúi men tamasha demalys syilamaq.
Aina Eskenqyzy
