Búgin elordada BTsP-men aýyratyn jastardyń taǵdyryn sýretteitin film kórsetiledi. Bul jaiynda QR Mádeniet jáne sport ministri Arystanbek Muhamediuly Feisbýktegi paraqshasynda jazdy, dep habarlaidy "Ult aqparat".
«Búgin keshke Astanada erekshe filmniń tusaýkeseri bolady. Bizdiń ministrliktiń tapsyrysymen «Jańa álem» ARDI videostýdiiasy jáne «Qazaqfilm» kinostýdiiasy birlesip, «Qyz ben teńiz» tolyqmetrajdy kórkem filmin túsirdi. Bul áleýmettik dramaǵa Múgedek balalardyń ata-analar qaýymdastyǵy qamqorlyǵyna alǵan Dinara Sháripovanyń ómirindegi shynaiy oqiǵalar negiz bolǵan. Týyndy BTsP-men (balalardyń tserebraldy paralichi) aýyratyn jastardyń taǵdyryn sýretteidi. Siýjet barysyn ashyp, spoiler jasaǵym kelmeidi. Osy dramalyq kinotýyndynyń árbir kadryna, árbir sózine jan berip, shyn kóńilimen túsirgen jastarǵa qoldaý kórsetip, mindetti túrde kinoǵa kelińizder», - dep jazdy ministr.
Kinotýyndy stsenariiniń avtory jáne qoiýshy rejissiori - Ázizjan Zairov jáne Muhamed Mamyrbekov.
Film «Saryarqa» saýda ortalyǵyndaǵy «Kinopark 8 IMAX Saryarka» kinoteatrynda kórsetiledi.
