Elordadaǵy Saryarka kinoteatrynda «Qyz ben teńiz» atty áleýemettik kórkem filmniń tusaýkeseri ótti, dep habarlaidy QazAqparat tilshisi.
Filmde BTsP-men (balalardyń tselebraldy paralichi) aýyratyn Ásel esimdi boijetkenniń taǵdyry baiandalady. Siýjet boiynsha Áseldiń armany ómirden óz mahabbatyn jolyqtyryp, soǵan turmysqa shyǵý. Ýaqyt óte kele boijetken Tahir esimdi jigitti kezdestirip, ómiri ózgeredi.
«Bul film múmkindigi shekteýli jandardyń taǵdyryn baiandaityn «Bezgranichnye vozmojnosti» atty dialogiianyń ekinshi bólimi. «Byt ili ne byt» atty birinshi bóliminde sal aýrýymen aýyratyn jas jigittiń taǵdyry beinelengen. Al ekinshi bólimde Ásel esimdi boijetkenniń taǵdyry baiandalady. Basty róldegi keiipkerdiń ómiri arqyly, adam aldyna maqsat qoisa, qandai qiynshylyqtarǵa qaramastan armanyna qol jetkize alatynyn kórsetkimiz keldi. Sol siiaqty Ásel taǵdyrdyń bergen synyna qaramastan, ómir súrýge degen qushtarlyǵy bir sát saiabyrsyǵan emes, kerisinshe ol kóp dúnieni armandap, óz maqsatyna qol jetkize bildi», - deidi film rejisseri ári prodiýseri Ázizjan Zairov.
Kinotýyndynyń aityp óter ereksheligi, basty róldi somdaityn keiipkerler kásibi ártister emes. Odan bólek, róldi somdaýshylardyń arasynda Almatydaǵy «ARDI» ońaltý ortalyǵynyń oqýshylary da bar.
«Múmkindigi shekteýli jandar týraly baiandaityn bul film kórermenge oi salatyn, óte kúrdeli týyndy. Ókinishke qarai, búginde biz qoǵamdaǵy múmkindigi shekteýli jandardyń ómiri jaily, olardyń ainalysatyn isteri, qyzyǵýshylyqtary, sondai-aq alǵa qoiǵan maqsattary men arman-tilekteri jaily bile bermeimiz. Statistikaǵa súiensek, Qazaqstanda 600 myńnan astam múmkindigi shekteýli adam turyp jatyr eken, bul jalpy halyq sanynyń 3,5 % quraidy. Osy turǵyda múgedektigi bar jandarǵa jaǵdai jasaý, olarǵa qoljetimdi orta qurý men qoǵamnan tys qalmaýyna jiti kóńil bólý, bizdiń basty maqsatymyzdyń biri», - dedi QR Mádeniet jáne sport ministri Arystanbek Muhamediuly.
QR Mádeniet jáne sport ministrliginiń tapsyrysymen «Qazaqfilm» kinostýdiiasy túsirgen «Qyz ben teńiz» filminiń rejisseri Muhamed Mamyrbekov pen Ázizjan Zairov.
Basty rólderde Dinara Sháripova, Tahir Omarov, Qanaǵat Tasqaraev, Gúlbahram Baibosynova, Saýran Qasteev, Almat Ádilbaev jáne basqalar.
