Astanalyqtardyń kóbisi jańa úlgide salynǵan portrettiń mán-maǵynasyn túsinbeidi. Al úlken kisiler áp-ádemi sýretti «búldirip tastaǵany» úshin sýretshilermen sózge kelip qalatyn kórinedi, dep xabarlaidy QazAqparat tilshisi.
«Iá, keibir kisiler urysyp ketedi. Bizdi vandal dep oilaidy. Óitkeni biz bas kezinde Sáken Seifýllinniń kádimgidei portretin salyp shyqtyq. Endi, ústinen núktelerdi salyp jatyrmyz. Sodan úlken kisiler portretti «búldirip jatyr» dep oilaidy. Negizi, bul da sýret salýdyń bir stili. Ony «neopointilistik stil» dep ataýǵa bolady. Ondaida myńdaǵan núktelerden bir sýret shyǵady. Bul degenimiz, árbir adam tarixtyń bir bólshegi ispettes. Al bárin qosqanda tutas bir tarix, tutas bir portret, xalyqtyń ulttyq kody shyǵady», - deidi sýretshi Stepan Krasnov.
Onyń aitýynsha, jaqyn jerden Sáken Seifýllinniń portreti anyq kórinbeýi múmkin. Alaida alystan tamasha kartina bolyp shyǵady.
«Osy portretti salýǵa bes kúndei ketetin shyǵar. Biz aldymen eskizin jasadyq. Odan keiin myna jaqta komissiia qarady. Sosyn xalyq daýys berdi. Sóitip, osy sýretti tańdady. Bir-eki kúnde aiaqtap qalamyz. Portret tolyǵymen núktelermen boialady», - dedi S.Krasnov QazAqparat tilshisine bergen suxbatynda.
Stepannyń ózi Máskeýden keldi. Odan bólek, Astanada Tatarstannyń, tipti Frantsiia men Italiianyń sýretshileri úilerdiń qabyrǵalaryna óz týyndylaryn salýda.
Máselen, Sáken Seifýllin kóshesiniń bas jaǵynda barystyń ádemi sýretin salyp qoidy. Bas kezinde qabyrǵany tolyǵymen kók túske boiap tastaǵanda jergilikti turǵyndar túsinbei qalǵan. Baibalam salyp, shaǵym túsirgender de bolypty. Alaida qazir barlyǵy dán riza.
Al Iliias Esenberlin kóshesiniń boiynda turǵan úidiń qabyrǵasyna qazaq qyzynyń sýretin saldy. «Ol jer-jahannyń tarixyn jazyp otyr», - deidi avtorlar.
Jalpy, búginde osy ispetti ónerge suranys joǵary. Máselen, kúni keshe ǵana Astanadaǵy bir úidiń qabyrǵasyna sýret salǵan jigit búgin Portýgaliiada júr. Ol jaqtan da mańyzdy bir tapsyrys túsken kórinedi.
Aita keteiik, elordada ASTANA Street Art festivali ótýde. Sonyń aiasynda qazaqstandyq jáne sheteldik sýretshiler úilerdiń qabyrǵalaryna óz týyndylaryn salyp júr.
