Foto: elements.envato
Astanada "Qnet" qarjy piramidasynyń basshysyna qatysty sot úkimi shyqty, dep habarlaidy Sputnik Qazaqstan qalalyq sottyń baspasóz qyzmetine silteme jasap.
Sot materialdaryna sáikes, sottalýshy J. Astana qalasy men Aqmola oblysynyń aýmaǵynda "Qnet" qarjy piramidasyn uiymdastyryp, tórt jyl boiy Stepnogor, Shýchinsk, Atbasar, Kókshetaý men Shortandy turǵyndaryn aldaǵan. Óziniń ókilderi de bolǵan. Olar biraz adamdy qarjy piramidasyna aqsha salýǵa kóndirgen. Odan tabys túsetinine ýáde bergen. Tipti, jábirlenýshilerge psihologiialyq qysym kórsete otyryp, ekinshi deńgeidegi bankterden, sonyń ishinde taýarlyq nesieler alýǵa májbúrlegen.
"Shyndyǵynda, tólemder basqalardy tartý esebinen júrgizilgen jáne tólemder mólsheri salynǵan qarajat somasynyń tek 10-15%-in ǵana qurady. Ári qarai "QNET"-ke adamdardy turaqty tartýdyń bolmaýyna bailanysty tólemder túspegen. Osylaisha, tómende turǵan adamdar turaqty negizde tólemder almaǵan nemese jańa tulǵalardy tartý arqyly azdaǵan mólsherde ǵana baiyǵan. Al ol, tipti, bank mekemelerinde paiyzben alynǵan investitsiialanǵan jeke qarajatty da ótemegen", - delingen sot úkiminde.
Sotqa barlyǵy 136 jábirlenýshi júgingen. Olarǵa 145 mln teńgeden astam somaǵa zalal keldi.
Sot úkimimen J. Qylmystyq kodekstiń eki baby – 217 (qarjy piramidasyn qurý jáne basqarý) jáne 218 (qylmystyq jolymen alyǵnan aqshany jáne ózge múlikti zańdastyrý) boiynsha kináli dep tanylyp, 6 jylǵa bas bostandyǵynan aiyryldy. Onyń múlki tárkilenedi. Sondai-aq azamattardyń aqshalai qarajaty men investitsiialardy tartýǵa bailanysty qyzmetpen ainalysýǵa 5 jylǵa tyiym salynǵan.
Úkim zańdy kúshine engen joq.
