Elimiz boiynsha «Samuryq-Qazyna» qarjylandyrýymen 20 erte aralasý ortalyǵy ashylǵan. «Qamqorlyq» dep atalatyn bul mekemelerde shala týǵan jáne damýynda qaýip faktorlary bar sábilerge erte kezeńnen bastap keshendi kómek kórsetedi. Munda balalardyń damýyndaǵy aýytqýlar der kezinde anyqtalyp, túzetý jumystary júrgiziledi. Bul balalardyń erte jastaǵy múgedektiginiń aldyn alýǵa jáne olardyń tolyqqandy damýyna jaǵdai jasaýǵa yqpal etedi.
«Samuryq-Qazyna» qory biryńǵai qaiyrymdylyq operatory Samruk-Kazyna Trust arqyly elimizdegi ońaltý qyzmetin júieli túrde damytyp keledi. 2020 jyldan beri túrli baǵyttaǵy 55 ońaltý ortalyǵy ashylǵan. Onda jyl saiyn 21 myńnan astam balalarǵa jan-jaqty ońaltý men áleýmettik beiimdeý júrgiziledi.
Osyndai mekemelerdiń biri Astanada ornalasqan. Elordadaǵy «Qamqorlyq» erte aralasý ortalyǵyn 20 jyldyq eńbek ótili bar dáriger-reabilitolog Dina Tájibaeva basqarady. Onymen birge dárigerler, logopedter, emdik dene shynyqtyrý nusqaýshylary, defektologtar, ergoterapevter men psihologtardan quralǵan mamandar toby jumys isteidi.
Ortalyq ai saiyn úsh jasqa deiingi 50-ge jýyq balany qabyldaidy. Al jyl saiyn munda 600-ge jýyq kishkentai patsient ońaltý kýrsynan ótedi.
Dina Tájibaevanyń aitýynsha, ortalyqqa kóbine balalar tserebraldy sal aýrýy (TsSA), Daýn sindromy, psiho-sóileý damýynyń tejelýi jáne basqa da damý erekshelikteri diagnozy qoiylǵan balalardyń ata-analary júginedi.
– Biz jumysymyzdy úsh baǵyt boiynsha júrgizemiz. Birinshisi – meditsinalyq, ekinshisi – pedagogikalyq, úshinshisi – áleýmettik, iaǵni otbasymen jumys. Biz jabyq esik jaǵdaiynda jumys istemeimiz: ata-analar mindetti túrde sabaqtarǵa qatysady. Biz olarǵa ne isteý kerektigin túsindirip, is júzinde kórsetemiz. Ońaltý úderisi úzdiksiz bolýy tiis, sondyqtan barlyq daǵdyny úi jaǵdaiynda da turaqty túrde bekitip otyrý óte mańyzdy.
Mysaly, bizdiń bir kishkentai patsientimiz júktiliktiń nebári 24–25 aptasynda shala týǵan. Ol ár úsh ai saiyn ońaltý kýrsynan ótip turdy. Alǵashynda basyn ustai bastady, keiin aýnaýdy, otyrýdy úirendi, al bir jarym jasynda ózdiginen júrip ketti. Kelesi ońaltý kýrsyna kelgende anasy balasynyń kádimgi balabaqshaǵa baryp júrgenin aityp, ózi de jumysqa qaita ornalasqanyn jetkizdi, – dedi Dina Tájibaeva.
Ortalyq basshysynyń aitýynsha, ońaltýdyń úzdiksiz ári keshendi júrgizilýi balalardyń damýyna oń áser etedi. Tipti shala týǵan sábilerdiń ózi ýaqytyly kórsetilgen kómektiń arqasynda qatarlastarymen birge qalypty damýǵa múmkindik alady.
– Ortalyqtaǵy barlyq zamanaýi jabdyq osydan tórt jyl buryn «Samuryq-Qazyna» qorynyń qoldaýymen alynǵan. Biz ońaltý barysynda ártúrli ádistemelerdiń elementterin qoldanamyz, óitkeni ár balaǵa dál ózine sai keletin tásildi tańdaý óte mańyzdy. Emdik dene shynyqtyrýda Bobat-terapiiasy, Voita-terapiiasy, kinestetika jáne basqa da ádister paidalanylady. Keide bir balaǵa birneshe ádis birdei tiimdi bolsa, endi birine olardyń eshqaisysy sáikes kelmeýi múmkin. Ondai jaǵdaida biz balanyń ereksheligine qarai basqa sheshim izdeimiz, – dedi ońaltý ortalyǵynyń basshysy.
2016–2026 jyldar aralyǵynda Qazaqstan boiynsha «Samuryq-Qazyna» qoldaýymen 275 áleýmettik nysan paidalanýǵa berilgen. Olardyń qatarynda 55 ońaltý ortalyǵy, 31 inkliýziia kabineti, 19 sport kesheni jáne 3 kreativti hab jáne basqa da nysandar bar.
Biylǵy jyldyń alǵashqy alty aiynda qor Samruk-Kazyna Trust arqyly 24,6 mlrd teńge kóleminde qarjy bólip, 27 áleýmettik joba jol tartty. Olardyń qatarynda Aqtóbede inkliýzivti sport ortalyǵy, Abai oblysynda Ábilhan Qasteev atyndaǵy murajai, Atyraý oblysynyń Dossor kentinde kitaphana men murajai ashylyp, el boiynsha taǵy 11 sport kesheniniń qurylysy bastaý aldy.
