Foto: Ult.kz
6 qyrkúiekte Astana qalasynda «Parýsa dýha» jobasy aiasynda «Ekstrabiliti kúnderi» atty halyqaralyq áleýmettik-sporttyq is-shara ótti, dep habarlaidy Ult.kz tilshisi.
Áleýmettik-sporttyq shara 2011 jyldan beri álemniń túkpir-túkpirinde ótkizilip keledi eken, sońǵy úsh jylda Qazaqstanda uiymdastyrylyp otyr.
«Ekstrabiliti kúnderi» on jyldan beri «Rosatom» memlekettik atom energiiasy korporatsiiasynyń qoldaýymen júzege asyp kele jatqan «Belaia Trost» avtonomdy kommertsiialyq emes uiymy uiymdastyratyn erekshe shara.
Jyl saiyn qatysýshylar Balqash kóliniń jaǵasyndaǵy «Nurbaqyt» demalys úiinde jinalyp, daiyndalady eken. Al jabylý saltanaty Astanada gala-kontsertpen aiaqtalady.
Biyl Astanaǵa Qyrǵyzstan, Túrkiia, Resei, Latviia, Egipet jáne basqa da elderden qatysýshylar keldi. Solardyń biri jalpyreseilik múgedekter qoǵamy, Sýrgýt múgedekter qoǵamdyq uiymynyń jetekshisi Iýrii Aleksandrov. Ol «Parýsa dýha» jobasy aiasynda tórt jyldan beri 15 is-sharaǵa qatysypty.
«Negizgi ereksheligi ‒ jobany múgedekter uiymdastyrýynda jáne buǵan qalaǵan adam qatysa alady. Kórip otyrǵanymyzdai jelkendi qaiyq, jel qaiyqtardyń túr-túri bar. Sharadaǵy sport túrleri birshama ekstremaldy bolǵanyna qaramastan, uiymdastyrýshylar qaýipsizdigi joǵary deńgeide ótkizip otyr», ‒ deidi ol.
Fotoda: Iýrii Aleksandrov
«Jarysqa qatysatyn qaiyqtar múgedekterge beiimdep jasalmaǵan, biraq olardy múgedekter úshin qalai qaýipsiz qoldanýǵa bolatynyn bilemiz» deidi Iýrii Aleksandrov. Sebebi sharany uiymdastyrýshylardyń ózderi múgedek jandar.
«Áleýmettik-sporttyq is-sharaǵa qatysýshylardyń barlyǵy kásibi sportshylar emes. Olardyń fizikalyq kúshi kóp bolmasa da, rýhani erik-jigeri mol. Jarystyń maqsaty ‒ olarǵa jaqsy kóńil-kúi syilaý, belsendiligin arttyrý, qabiletin shyńdaý», ‒ dep otyr ol.
Iýrii Aleksandrov mundai is-sharany qoǵamdy bailanystyrýdyń jańa formaty dep esepteidi.
«Ár sharadan jańa tájiribe alasyń. Bizdiń aramyzda múgedekter de, saý adamdar da, bastyqtar da, qarapaiym jumysshylar da, ártúrli ulttyń ókilderi de bar. Olar bir birimen qarym qatynas jasaýdy, túsinisýdi jelkendi qaiyq ústinde úirenedi. Sharanyń ereksheligi de, qundylyǵy da osy dep oilaimyn», ‒ deidi Sýrgýt múgedekter qoǵamdyq uiymynyń jetekshisi.
Biylǵy «Parýsa Dýha» jobasynyń basty taqyryby — «Rýhani baiýǵa birge baǵyt alý». Ol qoǵamdy rýhani qazynaǵa toltyryp, tájiribemen almasý, bir biriniń dástúri men tarihyna boilaý.
Bul týraly «Parýsa dýha» jobasynyń jetekshisi Oleg Kolpashikov tilshimizge bergen suhbatynda aityp berdi.
Fotoda: Oleg Kolpashikov
«Bizdiń negizgi maqsatymyz ‒ qazaqstandyq seriktes-dostarymyzben birge adam boiyndaǵy qabiletteri men talanttaryn ashyp, damytatyn, qoǵamdy myqtyraq etetin joba uiymdastyrý. Jobadan keiin de olardyń qabiletteri septigin tigizse deimiz», ‒ deidi Oleg Kolpashikov.
Esil jaǵalaýynda ótken sharanyń baǵdarlama aiasynda qonaqtarǵa arnap inkliýzivti regata, onnan astam sezimderdi damytýǵa arnalǵan sheberlik sabaqtary jáne katamaran bortynyń ústinde biregei gala-kontsert ótkizildi.
«Ekstrabiliti kúnderi» halyqaralyq áleýmettik-sporttyq is-sharasynda Rossotrýdnichestvo jáne orys úiiniń basshysy Olga Filonova, Qoǵam qairatkeri, sportshy, Májilis depýtaty Kenjeǵul Seitjan jáne basqa da azamattar sóz sóilep, yqylas bildirdi.
Is-shara júzdegen adamnyń qoly men daýysy bir yrǵaqta toǵysatyn, adamdardyń birligin beineleitin áserli ym-isharamen án aitý fleshmobymen aiaqtaldy.
Baljan Jeńisqyzy
