Jańaózennen turaqty jumys talap etip kelip, Astanadaǵy Energetika ministrligi ǵimaratynyń aldynda narazylyq bildirgen «BerÁli Mańǵystaý Company» kásipornynyń burynǵy qyzmetkerleri qamaýdan bosatylyp, poiyzben Jańaózen qalasyna qaitty. Áleýmettik jelide munaishylardyń Mańǵystaý halqyna jasaǵan úndeýiniń videosy tarady, dep habarlaidy "Ult aqparat".
Qolynda júgi bar olar ózderine qoldaý bildirgen halyqqa alǵys aityp, máseleleri sheshiletinin jáne osymen Mańǵystaýǵa qaitatynyn málimdegen.
"Biz din amanbyz, denimiz saý, balalarymyz túgel. Qazir, buiyrsa, aýylymyzǵa attanamyz. 10 adam kelissóz ótkizýge qalady. Esh ýaiymdamai, jumystaryńyzdy jalǵastyrýyńyzǵa bolady. Jańaózenniń, Mańǵystaý oblysynyń munaishylaryna alǵysymyzdy bildiremiz" - deidi ondaǵan adamnyń aldynda turyp sóilegen munaishylardyń biri.
Aqparatty «QazMunaiGaz» kompaniiasy da rastady.
«QMG bailanys toby men «BerÁli Mańǵystaý Company» ókilderi arnaiy jumys komissiiasyn qurý týraly kelisimge keldi.
Ol komissiia «BerÁli Mańǵystaý Company» kompaniiasynyń burynǵy qyzmetkerleriniń talaptaryn zań aiasynda sheshý joldaryn qarastyratyn bolady. Komissiia quramyna «BerÁli Mańǵystaý Company» kompaniiasynyń burynǵy qyzmetkerlerinen 10 adam kiredi.
Quqyq qorǵaý organdary ustaǵan qalǵan munaishylardy bosatyp, olar Astana ýaqyty boiynsha 8:57-de poiyzben Jańaózen qalasyna ketti», - dep atap ótti kompaniiadan.
Aita keteiik, "QazMunaigaz" ben "Ózenmunaigazǵa" qyzmet kórsetetin "BerÁli Mańǵystaý Company" kásipornynda jumys istegen bul azamattar "QazMunaiGaz" uiymdastyrǵan tenderde "BerÁli Mańǵystaý Company" jeńilgennen keiin jumystan qysqaryp qalǵan. "QazMunaiGaz" olarǵa jalaqysyn saqtai otyryp, "Kezbi" jáne Ai-Bis kompaniialarynan jumys usynǵan. Biraq olar bul usynysqa kelispei, "toǵyz aidan soń taǵy tender ótip, taǵy da jumyssyz qalamyz, bizge turaqty jumys kerek" degen talap qoiǵan.
11 sáýirde Energetika ministrliginiń aldyna túnep shyqqan narazy munaishylarmen "QazMunaiGaz" ókilderi kezdesip, eki jaq mámilege kele almaǵan edi. Jańaózendikter turaqty jumys berý týraly talaby oryndalmaiynsha turǵan jerinen taramaitynyn málimdegen.
Sol kúni keshkisin jańaózendik jumysshylardy politsiia men arnaiy jasaq kúshtep ustap áketti.
Keiin politsiia alyp ketken jańaózendik munaishylardyń ekeýiniń videoúndeýi áleýmettik jelide taraǵan. Videoda sóilegen "BerÁli Mańǵystaý Company" kompaniiasynyń burynǵy jumysshylary Jolmurat Luqpan men Nursultan Nurymuly "kóbimiz búgin poiyzben, keibirimiz erteń ushaqpen Mańǵystaýǵa qaitatyn boldyq" dep habarlady.
video: Tengrinews.kz
