Astanada zergerlik dúkenniń kúzetshisi baiqamai qoqysqa tastaǵan 5 keli kúmis buiymdar tabyldy. Bul týraly Elorda Info tilshisine dúken kúzetshisi Jandos Ámirhanov telefon arqyly habarlady.
"Shynymdy aitsam, bul oqiǵanyń osylai aiaqtalǵanyna qýanyshtymyn. Oqiǵa bylai boldy: eki kún buryn maǵan bir er adam qońyraý shalyp, osy aýmaqta (7 Kontinent) turǵan adam týraly habarlady. Shamalap meken-jaiyn aitty. "Máskeý" úi kesheniniń mańynda óz úii bar dedi. Aýyzsha sipattap berdi: orta boily, saqaldy er adam. Búgin jumysta otyryp jarty saǵat buryn dalaǵa shyqtym. Qarasam álgi sipattap bergen adam kele jatyr. Eki kún burynǵy qońyraý esime tústi. Qasyna baryp sóilestim", - deidi kúzetshi.
Onyń aitýynsha, quny 2,5 million teńgeniń buiymdaryn taýyp alǵan adam mylqaý eken.
"Zergerlik buiymdardyń sonda ekenin túsindim. Ol erteń alyp kelemin dedi. Men birden úiine barýdy usyndym. Ózi mylqaý, sóilei almaidy. Qaǵazǵa meken-jaiyn jazyp berdi. Biz úiine baryp, buiymdardy aldyq. Syiaqy retinde 100 myń teńge berdik. Buiymnyń barlyǵy ornynda, bireýine de tiispepti", - dedi Ámirhanov.
Buǵan qosa ol eki kún buryn telefon arqyly kúmis buiymdardy taýyp alǵan azamat týraly aqparat bergen er azamatqa syilyq jasamaq niette.
"Eki kún buryn telefon shalyp aqparat bergen azamattyń aty - Bekzat. Mende onyń nómiri saqtaýly. Aqshalai syilyq jasap, alǵysymdy bildirgim keledi", - dedi dúken kúzetshisi. Sondai-aq jigit endi qoqys shyǵarmas buryn tekserip otyratynyn aitty. "Qoqys shyǵarýǵa qorqatyn boldym", - dedi ol sóz sońynda.
