Nur-Sultan qalalyq qoǵamdyq densaýlyq saqtaý basqarmasynyń basshysy Timýr Muratov meditsina uiymdary Jańa jyl meiramynda qalai jumys isteitindigin aitty, dep habarlady QazAqparat.
«Osy múmkindikti paidalana otyryp, azamattarǵa meditsinalyq uiymdardyń aldaǵy jańajyldyq merekede qalai jumys isteitinin habarlaǵym keledi. Alǵashqy meditsinalyq-sanitariialyq kómek uiymdarynda mereke kúnderi halyqqa meditsinalyq kómekti kezekshi dárigerler kórsetedi. MSAK uiymdarynda patsientterdi qabyldaý 1-4 qańtar jáne 7 qańtar kúnderi saǵat 8:00-den 18:00-ge deiin júzege asyrylady. Jalpy tájiribe dárigerleriniń kezekshilikte bolatynyn eskeremin. Osylaisha merekelerde belgili bir sala mamandarynyń kómegine júginý múmkin bolmaidy», - dedi basqarma basshysy qala ákimdiginde ótken baspasóz máslihatynda.
Sondai-aq,ol súzgi kabinetter, ambýlatoriialyq patsientterge meditsinalyq kómek kórsetetin mobildi brigadalardyń úzdiksiz jumysy, PTR ádisimen testileý jalǵasatynyn aitty.
«Súzgi kabinetterde kezekshilik etetin dárigerler keste boiynsha tańǵy 8-den keshki 8-ge deiin jumys isteidi. Ambýlatoriialyq patsientterge qyzmet kórsetý saǵat 8:00-den 16:00-ge deiin júrgiziledi. Qala statsionarlary jumys kúnderindegidei azamattardy táýlik boiy qabyldaidy. Árine, merekelik demalys kúnderin eskere otyryp, barlyq elordalyq aýrýhanalar rezervtegi beiindi palatalardy bóle otyryp, shuǵyl meditsinalyq kómek kórsetý úshin kúsheitilgen jumys rejimine kóshedi», - dedi Timýr Muratov.
