LRT qurylysy jalǵasady. Bul týraly Baigenews tikelei efirinde Nur-Sultan qalasynyń ákimi Altai Kólginov málim etti, dep habarlaidy QazAqparat agenttigi.
«Ýrbanistika ortalyǵy qoǵam men transport salasyndaǵy mamandardan usynys jinaǵanyn bilesizder. Osynyń negizinde halyqaralyq mamandar men el azamattarynan 400-den astam usynys tústi. Qoryta aitqanda, azamattardyń 51 paiyzdan astamy jobanyń jalǵasqanyn qalaidy. 42 paiyzy jobanyń ózge alternativada jasalǵanyn, salynǵanyn qoldaidy. Al usynys bildirgenderdiń 7 paiyzy qurylysty tolyq súrip tastaý qajet ekenin aitqan. Biz birneshe nusqany qarastyrdyq. Onyń ishinde osy nysandardy buzyp, ornyn tazartý ideiasy da boldy. Biraq qalada 500-den astam baǵana bar. Ony tolyq súrip tastaý úshin shamamen 20 mlrd teńge qajet. Sondyqtan biýdjetten kóp qarjy jumsalǵanyn eskere kele, LRT qurylysyn tolyq aiaqtaý oiǵa qonymdy dep sheshtik. Degenmen únemdeýge týra keledi. Bastapqyda jobaǵa 1 mlrd dollardan astam aqsha qajet bolatyn. Al biz shyǵyndardy qysqartý arqyly qurylysty aiaqtaýǵa 577 mln dollar qajet dep otyrmyz», - dedi elorda ákimi.
Altai Kólginov bastapqyda josparlanǵandai 18 stantsiia emes, 8 stantsiiany iske qosylatynyn málimdedi.
Ol áýejaidan bastap Qabanbai batyr dańǵylyna deiingi aralyqty qamtidy.
Ákimniń sózinshe, 5 jyljymaly quram jumys isteidi. Ár quramǵa jalpy sany 600 adam syiatyn 4 vagon jalǵanady.
«Transporttyń júrý jiiligi 15 minýt bolady dep josparlanyp otyr», - dep atap ótti Altai Kólginov.
