LRT قۇرىلىسى جالعاسادى. بۇل تۋرالى Baigenews تٸكەلەي ەفيرٸندە نۇر-سۇلتان قالاسىنىڭ ەكٸمٸ التاي كٶلگٸنوۆ مەلٸم ەتتٸ, دەپ حابارلايدى قازاقپارات اگەنتتٸگٸ.
«ۋربانيستيكا ورتالىعى قوعام مەن ترانسپورت سالاسىنداعى مامانداردان ۇسىنىس جيناعانىن بٸلەسٸزدەر. وسىنىڭ نەگٸزٸندە حالىقارالىق ماماندار مەن ەل ازاماتتارىنان 400-دەن استام ۇسىنىس تٷستٸ. قورىتا ايتقاندا, ازاماتتاردىڭ 51 پايىزدان استامى جوبانىڭ جالعاسقانىن قالايدى. 42 پايىزى جوبانىڭ ٶزگە التەرناتيۆادا جاسالعانىن, سالىنعانىن قولدايدى. ال ۇسىنىس بٸلدٸرگەندەردٸڭ 7 پايىزى قۇرىلىستى تولىق سٷرٸپ تاستاۋ قاجەت ەكەنٸن ايتقان. بٸز بٸرنەشە نۇسقانى قاراستىردىق. ونىڭ ٸشٸندە وسى نىسانداردى بۇزىپ, ورنىن تازارتۋ يدەياسى دا بولدى. بٸراق قالادا 500-دەن استام باعانا بار. ونى تولىق سٷرٸپ تاستاۋ ٷشٸن شامامەن 20 ملرد تەڭگە قاجەت. سوندىقتان بيۋدجەتتەن كٶپ قارجى جۇمسالعانىن ەسكەرە كەلە, LRT قۇرىلىسىن تولىق اياقتاۋ ويعا قونىمدى دەپ شەشتٸك. دەگەنمەن ٷنەمدەۋگە تۋرا كەلەدٸ. باستاپقىدا جوباعا 1 ملرد دوللاردان استام اقشا قاجەت بولاتىن. ال بٸز شىعىنداردى قىسقارتۋ ارقىلى قۇرىلىستى اياقتاۋعا 577 ملن دوللار قاجەت دەپ وتىرمىز», - دەدٸ ەلوردا ەكٸمٸ.
التاي كٶلگٸنوۆ باستاپقىدا جوسپارلانعانداي 18 ستانتسييا ەمەس, 8 ستانتسييانى ٸسكە قوسىلاتىنىن مەلٸمدەدٸ.
ول ەۋەجايدان باستاپ قابانباي باتىر داڭعىلىنا دەيٸنگٸ ارالىقتى قامتيدى.
ەكٸمنٸڭ سٶزٸنشە, 5 جىلجىمالى قۇرام جۇمىس ٸستەيدٸ. ەر قۇرامعا جالپى سانى 600 ادام سىياتىن 4 ۆاگون جالعانادى.
«ترانسپورتتىڭ جٷرۋ جيٸلٸگٸ 15 مينۋت بولادى دەپ جوسپارلانىپ وتىر», - دەپ اتاپ ٶتتٸ التاي كٶلگٸنوۆ.
