Astanada «Kóktem merekesin qarsy alý, Qytai Jańa jylyn toilaý» atty mádeni kesh ótti. Shara 2026 jylǵa arnalǵan Qytai Jańa jyly – Kóktem merekesine orai qytai tili muǵalimderi men oqýshylarynyń qatysýymen uiymdastyryldy, dep habarlaidy Ult.kz.
Saltanatty kesh Maqsut Narikbayev University-de ótip, Qazaqstan men Qytai arasyndaǵy mádeni-gýmanitarlyq bailanystardy nyǵaitýǵa arnaldy. Kontserttik baǵdarlama Qurmanǵazynyń «Adai» kúiimen jáne Arystan men Aidahar biimen ashyldy. Bul kórinis kórermenderge ulttyq rýh pen shyǵys mádenietiniń úilesimin kórsetti.
Shara barysynda quttyqtaý sóz sóilegen Maqsut Narikbayev University Ǵylym, innovatsiia jáne jasandy intellekt boiynsha basqarma tóraǵasynyń orynbasary Pen Sergei Gennadevich Kóktem merekesiniń halyqtar arasyndaǵy dostyqty bekemdeýdegi mańyzyn atap ótti. Sondai-aq Qytai Halyq Respýblikasynyń Qazaqstan Respýblikasyndaǵy Tótenshe jáne Ókiletti Elshisi Han Chýnlin myrza eki el arasyndaǵy bilim jáne mádeniet salasyndaǵy yntymaqtastyqtyń qarqyndy damyp kele jatqanyn aitty.
"2026 jyly Qytai men Qazaqstan ortaq taǵdyrly qoǵam qurý maqsatynda yntymaqtastyqty jańa deńgeige kóteredi. Ótken jylǵy QKP HH Ortalyq komitetiniń tórtinshi plenarlyq otyrysy aldaǵy bes jylǵa Qytaidyń damý strategiiasyn belgiledi. Qytai ekonomikalyq qurylysqa basymdyq berip, joǵary sapaly damýǵa, reformalar men innovatsiiaǵa negizdelgen saiasat júrgizetin bolady. Halyqtyń ósip kele jatqan ómir sapasyn qamtamasyz etý basty maqsat bolyp belgilendi. Zamanaýi ónerkásip júiesin qurýǵa, joǵary tehnologiialyq táýelsizdikke qol jetkizýge, ashyqtyq pen ózara tiimdilik printsipterin ustanýǵa baǵyttalǵan sheshýshi qadamdar jasalady. Al Qazaqstan «Jańa ekonomikalyq saiasat», «Ónerkásiptik innovatsiialyq damý», «Aýyl sharýashylyǵyn jańǵyrtý» jáne «Aimaqtyq infraqurylym» siiaqty strategiialyq maqsattardy júzege asyryp, modernizatsiiaǵa degen tabandylyǵyn kórsetýde", – dep aitty Elshi.
Sonymen qatar Han Chýnlin myrza bolashaqta qytai tilin meńgergen, eki eldi bailanystyra alatyn janjaqty mamandar kóptep shyǵady dep úmittenetinin jetkizdi.
"Olar eki eldiń ekonomikalyq yntymaqtastyǵyna baǵyt beretin kóshbasshy, ǵylym men tehnologiia salasynda aldyńǵy qatarly jetekshi jáne mádeni almasýda senimdi «altyn dánekerler» bolady!" – dedi ol óz sózinde.
Kontsert baǵdarlamasy mazmundy ári kópqyrly boldy. Kórermender nazaryna Astana qalasyndaǵy mektepter men joǵary oqý oryndarynyń stýdentteri daiyndaǵan bi jáne án qoiylymdary usynyldy. Atap aitqanda, «Sáigúlik», «Gúl ashý», «Jelmen jarysqan dala», «Jelpeýish» bileri men «Qosh bol, qymbattym», «Baqyt», «Armanǵa jetý», «Úzilmes mahabbat», «Quttyqtaimyn seni», «Rahmet sizge» sekildi ánder oryndaldy.
Keshtiń erekshe sátteriniń biri – «Jibek joly áýeni» dombyra sazynyń súiemeldeýimen ótken Qytai–Qazaq ulttyq kiimderiniń sán kórsetilimi boldy. Bul kórinis eki halyqtyń dástúri men óneriniń ózara úndestigin aiqyn kórsetti.
Uiymdastyrýshylardyń aitýynsha, mundai sharalar jastardyń mádenietaralyq túsinigin arttyryp, Qazaqstan men Qytai arasyndaǵy dostyq qatynastardy odan ári nyǵaitýǵa yqpal etedi.
Mádeni keshke L.N. Gýmilev atyndaǵy Eýraziia ulttyq ýniversiteti, Beijiń til jáne mádeniet ýniversitetiniń Qazaqstandaǵy filialy, Astana Turan ýniversiteti, Eýraziia gýmanitarlyq institýty, sondai-aq elordadaǵy birqatar mektep-gimnaziialar qatysty.
Kóńildi keshten áser alǵan kórermender qosyla án shyrqap, bi bilep, qoshemetterin jaýdyra otyrdy.
"Chýntsze – qytai halqynyń eń mańyzdy dástúrli merekesi. Ol IýNESKO-nyń adamzat mádeni murasy tizimine engizilgen. Bul mereke kezinde búkil álemdegi qytai qaýymdary eski jyldyń aiaqtalýy men jańa jyldyń kelýin toilaidy, baq pen tynyshtyq tileidi, bul meiramdy otbasymen birge atap ótedi. Chýntsze – otbasylardyń birligi men yntymaǵy kúni, qytai halqynda kóktem men bolashaq ómirge degen jaqsy úmittiń simvoly", – dep Qytai Halyq Respýblikasynyń Qazaqstan Respýblikasyndaǵy Tótenshe jáne Ókiletti Elshisi Han Chýnlin myrza merekeniń mańyzyn da túsindire ketti.
