QR Eńbek jáne xalyqty áleýmettik qorǵaý ministri Berdibek Saparbaev kópbalaly otbasylarǵa beriletin ataýly áleýmettik kómektiń taǵy bir jańalyǵyn jariialady, dep xabarlaidy QazAqparat tilshisi.
«Ataýly áleýmettik kómekke kelsek, Memleket basshysy naqty tapsyrma berdi, buryn januianyń árbir múshesine tabysty eseptegende (kúnkóris minimýmnyń - avt.) 50 paiyzdyń deńgeiinde bolsa, endi ony 70 paiyzǵa kóbeitedi. Eger buryn 14 849 teńge bolsa, 1 sáýirden bastap onyń kólemi 20 789 teńgege kóteriledi. Al endi Astana qalasynda basqa óńirlermen salystyrǵanda ortasha jalaqy joǵary, sondyqtan 21 698 teńgege deiin kóteriledi. Bizdiń boljamymyz boiynsha osy sharamen, kem degende, 830 myń qazaqstandyq qamtylady. Al Astana qalasynda, bul kem degende, 6 700-ge jýyq», - dedi B.Saparbaev Astanadaǵy kópbalaly analarmen bolǵan kezdesýde.
Ministrdiń aitýynsha, kópbalaly otbasynyń múshesi joǵary oqý ornynda oqysa, 21 myń teńgeniń járdemaqysy 23 jasqa deiin tólenedi.
«Osy ýaqytqa deiin januianyń árbir múshesine 4 834 teńge tólenip kelse, 1 sáýirden bastap otbasynyń árbir múshesine 20 789 teńge tólenetin bolady. Al Astana qalasynda - 21 698 teńge. Al otbasydaǵy er kisige jáne áiel kisige burynǵydai 10 500 teńge qosymsha tólenedi», - dep atap kórsetti B.Saparbaev.
Aita keteiik, Nur Otan partiiasynyń XVIII sezinde QR Prezidenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrdy.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deiin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar jaǵdai jaqsy azamattar bolyp shyǵa keledi», - dedi N.Nazarbaev. Jaqynda Memleket basshysy atalǵan sharalardy 1 sáýirden bastaýdy mindettedi.
QR Eńbek jáne xalyqty áleýmettik qorǵaý ministri Berdibek Saparbaev balalarǵa beriletin 21 myń teńgeden bólek ata-anasyna da qosymsha aqy tólenetinin jetkizdi. Búginde elimizde kúnkóristiń minimýmy 29 698 teńgeni quraidy. Osy ýaqytqa deiin ataýly kómekti bir adamǵa shaqqanda kúnkóris deńgeiiniń 50 paiyzynan, iaǵni 14 849 teńgeden aspaityn otbasylar alsa, endi Prezidenttiń tapsyrmasy boiynsha atalǵan kórsetkish 70 paiyzynan - 20 789 teńgege deiin kóterilip otyr. Demek, kópbalaly otbasynyń jalpy tabysyn árbir adamǵa bólgende aqshanyń somasy kúnkóris deńgeiiniń 70 paiyzǵa, iaǵni 20 789 teńgege jetpese, árbir balaǵa 21 myń teńgeniń járdemaqysy beriledi.
«Sosyn eger januianyń árbir adamyna shaqqanda tabys kúnkóris deńgeiinen (70 paiyzdan- avt.) tómen bolsa, aiyrmashylyq 10 myń teńge bola ma, 7 myń teńge bola ma, sol ata-anasyna da qosymsha tólenedi. Odan keiingi eń úlken jeńildik, buryn tabysty eseptegende «Altyn alqa», «Kúmis alqa», kóp balaǵa beriletin járdemaqy, múgedekterdiń járdemaqysy men stipendiiasy sanalatyn. Endi, sonyń bárin esepke almaidy», - deidi B.Saparbaev.
