Elordada «Qazaqstandy tany» halyqaralyq blogerler forýmy bastaldy, dep habarlaidy QazAqparat tilshisi.
Forýmdy QR Aqparat jáne qoǵamdyq damý ministrligi jáne Azamattyq bastamalardy qoldaý ortalyǵy Qazaqstandaǵy týrizmdi damytý maqsatynda uiymdastyrǵan.
Oǵan Qazaqstan, Ulybritaniia, AQSh, Aýstraliia, Italiia, Resei, Úndistan, Tailand, Kanada elderiniń tanymal saiahatshy blogerleri jinaldy. Olar Qazaqstannyń 5 óńirindegi blog-týrǵa qatysyp, Qazaqstannyń kórikti mekenderimen tanysqan.
«Bizdiń elimiz álem kartasyndaǵy jas memleket bolǵanymen, onyń bai tarihy bar. Bul jerde talai kóshpeli imperiialar qurylǵan. Bizdiń mádenietimiz Tamǵaly tastaryndaǵy sýretterden, Saq taipalarynyń ań stilinen bastalady. Búginde júzden astam etnos ókilderi beibitshilik pen kelisimde ómir súrip jatyr. Óńirlerdi aralaǵan forým qatysýshylary osyǵan kóz jetkizdi dep oilaimyn. Tutas álemniń týristeri qazaq jeriniń sulýlyǵyn kórgenin qalaimyz», dedi QR Aqparat jáne qoǵamdyq damý ministri Dáýren Abaev jiynnyń saltanatty ashylýynda.
Ol forýmǵa álemniń 18 elinen blogerler jinalǵanyn, osynyń nátijesinde Qazaqstan týraly jańa kontent qurylatynyn atap ótti.
«Qazirgi zamanda blogerler bizdiń ne kiip, ne tyńdaitynymyzǵa, qaida baratynymyzǵa tikelei yqpal etedi. Sizder kóptegen elderdiń týrizmi, ýrbanistikasy, sáýleti týraly kózqarasymyzdy ózgerttińizder. Kóptegen saiahatshylar týristik baǵyttardy tańdaýda áleýmettik jelidegi fotolar men jazbalarǵa, pikirlerge súienedi. Túrkiiadaǵy «Kapadokiia», AQSh-taǵy «Ibilis vannasy» Instagramdaǵy jazbalardan keiin erekshe tanymal boldy jáne saiahatshylar suranysyna ie boldy. Búgingi forým da bizdiń ǵajaiyp elimiz týraly paidaly aqparat beretin túbegeili jańa kontenttiń qurylýyna jáne birlesken jobalardyń paida bolýyna kómektesedi dep oilaimyn», - dep atap ótti D. Abaev.
Forým spikerleri týrizmdi, brending pen blogingti damytý, jańa media múmkindikteri men internettegi sapaly kontent qurý máselelerin talqylaidy.
Shara barysynda qatysýshylarǵa blogingti damytý týraly «Saiahattaǵy sýret», «YouTube profilin damytý», «Startap promoýter», «Biznes-bloging», «Áleýmettik shyndyq», «Qazaq Instagram» taqyrybynda sheberlik synyptary uiymdastyrylady.
Sonymen birge, forým aiasynda «Men - Qazaqstannanmyn» beineblog konkýrsynyń jetimpazdary marapattalady.
