Foto: QR MAM
Astanadaǵy Ulttyq akademiialyq kitaphanada Qazaqstan Jazýshylar odaǵynyń jyl qorytyndysyna arnalǵan «Jas ádebiettiń kókjiegi» atty ádebi-mádeni jiyn ótti, dep habarlaidy Ult.kz.
Is-sharaǵa QR Mádeniet jáne aqparat vitse-ministri Aibek Sydyqov, Qyrǵyz Respýblikasynyń memlekettik hatshysy, Qyrǵyzstannyń El jazýshysy Arslan Qoishiev, Qazaqstan Jazýshylar odaǵy Basqarmasynyń tóraǵasy Mereke Qulkenov jáne Qazaqstannyń belgili aqyn-jazýshylary, ádebiettanýshy ǵalymdar, ziialy qaýym ókilderi men jas qalamgerler qatysty. Kezdesý barysynda Aibek Sydyqov QR Premer-ministriniń orynbasary – mádeniet jáne aqparat ministri Aida Balaevanyń quttyqtaý hatyn oqydy.
«Mádeniet jáne aqparat ministrligi qalamgerlerge, rýhaniiat salasyna qoldaý kórsetý maqsatynda Jazýshylar odaǵymen jemisti jumys istep keledi. Onyń ishinde «Strategiialyq áriptestik» baǵyty boiynsha jasalyp jatqan jobalar men mereitoilardy atap ótý, qalamaqy tóleý, kitaptar basyp shyǵarý, halyqaralyq kitap kórmelerinde nasihattaý jumystarynyń mańyzy zor. Búgingi memlekettik tapsyryspen jáne «Qazaqstannyń ádebi-tanymdyq panoramasy» jobasy aiasynda jaryq kórgen jańa kitaptardyń tanystyrylymy qutty bolsyn! Barsha qalamgerlerge shalqar shabyt tileimin!», — delingen quttyqtaý hatta.
Basqosýda ulttyq ádebiettiń damý baǵyttary men qazirgi zaman ádebietiniń ózekti máseleleri talqylandy.
Is-shara aiasynda «Túrki áleminiń ádebieti» jobasy boiynsha jaryq kórgen 4 jańa kitaptyń, «Qoǵamdyq mańyzy bar ádebietterdi basyp shyǵarý jáne taratý» memlekettik baǵdarlamasy sheńberinde shyqqan 2 kitaptyń, sondai-aq jas qalamgerlerdiń 20 kitabynyń tusaýkeseri ótti.
Foto: QR MAM
Jaryqqa shyqqan barlyq kitaptar elimizdegi jalpyǵa birdei qoljetimdi kitaphanalarǵa taratyldy.
Jiyn barysynda sóz sóilegen Arslan Qoishiev túrki halyqtary arasyndaǵy ádebi yntymaqtastyqtyń mańyzyn atap ótip, ádebi jobalardy júieli túrde qoldap kele jatqan Qazaqstan Respýblikasynyń Mádeniet jáne aqparat ministrligi men Qazaqstan Jazýshylar odaǵyna alǵysyn bildirdi. Ol mundai bastamalardyń ortaq rýhani qundylyqtardy dáripteýge jáne qalamgerler arasyndaǵy shyǵarmashylyq bailanysty nyǵaitýǵa airyqsha úles qosatynyn jetkizdi.
Kezdesý sońynda ádebiettegi jańashyl úrdister, túrki dúniesiniń ortaq rýhani qundylyqtary men bolashaqtaǵy shyǵarmashylyq yntymaqtastyq baǵyttary sóz boldy.
